Astanada Jeńis dańǵylyna kúrdeli jóndeýdiń aıaqtalýyna oraı dańǵyldyń merekesi ótedi - ákimdik

TANA. 14 qazan. QazAqparat /Gúlmıra Alıakparova/ - Ústimizdegi jylǵy 16 qazanda Astanada qalanyń qaqpasy - temirjol vokzaly men elordanyń tarıhı ortalyǵyn baılanystyratyn - Jeńis dańǵylynyń merekesi ótedi. Bul týraly Astana ákiminiń baspasóz qyzmetinen málim etti.

Merekeni «Saryarqa» aýdanynyń ákimdigi qalanyń oń jaǵalaýyndaǵy eń kóne magıstraldiń túbegeıli jańartylýyna oraı ótkizip otyr.

Atalmysh dańǵyldyń tarıhy Tselınograd Qalalyq atqarý komıtetiniń №12/370-shi sheshimimen 1965 jyldyń 5 mamyrynda Sportıvnaıa kóshesi 1941-1945 jyldarǵy Uly Otan soǵysyndaǵy jeńistiń 20 jyldyǵyna oraı - Pobeda dańǵyly ataýyna ıe bolǵan kezeńnen bastalady. Qazaqstan Táýelsizdik alǵannan keıin jáne elorda Astana statýsyna ıe bolǵannan keıin Astana qalasy ákimdiginiń 2007 jylǵy 5 jeltoqsandaǵy №60-shy qaýlysymen jáne qalalyq máslıhattyń 2007 jylǵy 12 jeltoqsandaǵy sheshimimen Pobeda dańǵylynyń ataýy Jeńis dańǵyly bolyp bekitildi.

Jeńis dańǵylynyń magıstraldi dárejesi onymen janasatyn aýmaqtardyń damýyna yqpalyn tıgizdi. Dańǵyldyń boıymen ár jyldary temir joldyń ákimshilik ǵımarattary, vedomstvolyq aýrýhanalar, ýnıversıtetter, ýnıvermagtar, stadıon, kitaphana men júzdegen turǵyn úıler boı kóterdi. Búginde dańǵyldyń boıynda shaǵyn jáne orta bıznestiń 146 nysany, 4 oqý mekemesi, aýrýhana, 3 bank, 3 saıabaq, kitaphana, densaýlyq ortalyǵy, 5 stomatologııa jáne 81 turǵyn úı ornalasqan.

Biraq sońǵy jyldary UO soǵysyna deıingi jyldary tóselgen ınjenerlik ınfraqurylymnyń tozyǵynyń jetýi Jeńis dańǵylymen janasatyn aýmaqtardy damytýǵa kedergisin tıgize bastady. Jylý magıstraldaryndaǵy, sý jáne káriz jelilerindegi jyl saıynǵy apattardyń sońynda Jeńis dańǵyly halyq aýzynda «geologtar dańǵyly» atala bastady.

Problemany túbegeıli sheshý úshin 2011 jyly Astana ákimdigi dańǵyldy kúrdeli jóndeýden ótkizip, jol astynda ornalasqan ınjenerlik kommýnıkatsııalardy túgelimen aýystyrý sheshimin qabyldady. Jumystar 9 sáýir men 15 qazan aralyǵynda júrgizildi. Nátıjesinde, uzyndyǵy 3,386 shaqyrym bolatyn Jeńis dańǵylynyń 4 407 metr jerinde turmystyq káriz jelileri, 8 384 jaýynǵa qarsy jeliler, 4 178 telefon jelisi aýystyryldy. Sondaı-aq, jylý júıesiniń 1 869 metr jerine jańa qubyrlar salyndy. Zamanaýı materıaldan jasalǵan qubyrlar Jeńis dańǵylyna 50 jylǵa deıin apattyq qoparýlar júrgizbeýge múmkindik beredi.

Osy kúnderi dańǵyldy abattandyrý jumystary aıaqtalý ústinde. Onymen birge, dańǵyldyń boıynda jatqan 40 úıdiń aýlasyna abattandyrý júrgizilýde. Olarǵa kireberis joldar asfalttalyp, jol jıegindegi kómkermeler aýystyrylýda.

Jeńis dańǵylyn qaıta jóndeýden ótkizýge 6,5 mlrd. teńge qarajat jumsaldy.

Aıta keteıik, bıyl sondaı-aq, Astananyń oń jaǵalaýyndaǵy uzyndyǵy 2,54 shaqyrym bolatyn Imanov kóshesine de qaıta jóndeý júrgizildi. Joba eki kezeńmen júzege asyryldy. Onyń ekinshi kezeńi 2012 jyly qaıta bastalady. Imanov kóshesin qaıta jóndeý jobasyna bıýdjetten 5,2 mlrd. teńge bólindi.