Astanada «Jaıly mektep» ulttyq jobasyn iske asyrý jumysy bastaldy

ASTANA. QazAqparat - Astanada «Jaıly mektep» jobasy júzege asyryla bastady. Memleket basshysynyń tapsyrmasy boıynsha «Jaıly mektep» ulttyq jobasy aıasynda Astanada 24 mektep salynady, dep habarlaıdy QazAqparat elorda ákimdigine silteme jasap.

Jańa formattaǵy oqý oryndary eki aýysymda 90 myńǵa jýyq oqýshyǵa arnalǵan oryn ashýǵa múmkindik beredi. Máselen 24 jaıly mekteptiń 15-i qarqyndy damyp kele jatqan Nura men Esil aýdandarynda ornalasatyn bolady. Sondaı-aq jaıly mektepter qalanyń eldi mekenderinde de ornalasatyn bolady.

Qazirgi ýaqytta 15 jaıly mektep boıynsha jumys bastaldy. Astana ákimi Jeńis Qasymbek pen Samruk-Kazyna Construction Basqarma tóraǵasy Máýlen Aımanbetov mektepterdiń jobalarymen jáne qurylys jumysynyń daıyndyq barysymen tanysty. Qazirgi ýaqytta jer ýchaskelerin daıyndaý boıynsha jumys júrip jatyr: qorshaýlar, ınjenerlik-geologııalyq izdestirý, qadalardy biteý, qurylys tehnıkasyn jumyldyrý jáne t.b.

Astana ákimi Jeńis Qasymbek ózge de birqatar memlekettik mekteptiń qurylysymen tanysty. Máselen Turan dańǵyly men №24 kósheniń, Qarasaı batyr men Bulanty, Kókseńgir kósheleriniń qıylysyndaǵy mektepter, sondaı-aq qazirgi №17 jáne №27 mektepterdiń janyndaǵy jańa ǵımarattar. Qazirgi ýaqytta 14 mekteptiń qurylysy júrip jatyr, onyń 11-i jańa oqý jyly ishinde ashylatyn bolady. Mektepterdiń qurylysy jańa aýdandarda da, qalanyń oń jaǵalaýynda da, eldi mekenderde de júrgizilip jatyr. Olardyń bir bóligi apatty jaǵdaıdaǵy mektepterdi almastyrady.