Astanada jaýyngerler zıratyna gúl shoqtaryn qoıý rásimi ótti

ASTANA. QazAqparat - Búgin Astanada 1941-1945 jyldardaǵy Ekinshi dúnıejúzilik soǵysta jaraqat alyp, qaıtys bolǵan aqmolalyq jaýyngerlerdiń qorymynda dástúrli túrde gúl sebetterin jáne «Dańq gúl shoqtaryn» qoıý rásimi ótti, dep habarlaıdy elorda ákimdiginiń resmı saıty.

Jas ulan mektebiniń oqýshylary jáne ardagerler saltanatpen sap túzep ótip, eskertkish taqtaǵa gúl shoqtaryn qoıdy. Marqumdardy eske alý is-sharasynda soǵys ardagerleri, tyl eńbekkerleri, qaza bolǵan marqumdardyń týystary, Astana qalasy ákimdiginiń basshylary, qoǵamdyq jáne jastar uıymdarynyń ókilderi qatysty. Astana qalasy ákimdigi atynan ákim orynbasary Ermek Amanshaev sóz sóıledi.

«Keler urpaqtyń beıbit ómir súrýine, Otanyn qorǵaýǵa jáne odan keıingi ómirde saltanatty ómir súrý úshin shybyn jandaryn qıǵan ardagerlerdi eske alyp turmyz. Osy Aqmola óńirinen surapyl soǵysqa attanǵandardyń ishinen otyz jaýynger Keńes Odaǵynyń Batyry ataǵyn alǵan. Sizderdiń erlikterińiz bizdiń júregimizde máńgi saqtalady. Sizderge Astana qalasy ákimdiginiń jáne qala turǵyndarynyń atynan basymyzdy ıip alǵys aıtamyz. Densaýlyqtaryńyz zor bolyp, bizge úlgi kórsetip aramyzda júre berińizder. Meıramdaryńyz qutty bolsyn!», - dedi Ermek Amanshaev.
 

Qazirgi tańda elordamyzda toqsannan asa ardager jáne úsh myńǵa jýyq tyl eńbekkeri turyp jatyr.

Astana qalalyq ardagerler keńesiniń tóraǵasy Sansyzbaı Esilovtiń sózinshe, ótken jyly Jeńis merekesin júz otyzǵa jýyq ardager qarsy alsa bıylǵy merekeni toqsannan asa ardager qarsy alaıyn dep otyr.

Elordada turyp jatqan barlyq ardagerler sanatorıı-kýrorttyq emdeýmen jáne kommýnaldyq-turmystyq qyzmetterdi óteýge aı saıyn aqshalaı ótemaqymen qamtamasyz etilgen, sondaı-aq ardagerlerge áleýmettik kómek kórsetiledi. 
 

Aıta keteıik, osy jyly Astana qalasy máslıhatynyń sheshimimen barlyq Ekinshi dúnıejúzilik soǵysynyń ardagerlerine 500 myń tenge kóleminde birjolǵy materıaldyq kómek tólengen.