Astanada jat dinı aǵym ókilderin anyqtaý, olardy ońaltýǵa jiberý máselesi qaraldy

ASTANA. QazAqparat  - Kontrterrorıstik komıtet Astana ákimdigimen birlesip destrýktıvti dinı birlestik ókilderin anyqtaý, esepke qoıý jáne ońaltý boıynsha joba sheńberinde aýqymdy jumystardy atqarmaq, dep habarlaıdy elorda ákimdiginiń resmı saıty.

Atap aıtqanda, memorgan qyzmetkerleri úshin «Jat dinı aǵym ókilderimen tıimdi jumys júrgizýdiń negizderi» atty semınar bolyp ótti. Onda «Kontrterrorıstik komıtet» RQB basshysy Amanjol Orazbaev destrýktıvti dinı birlestikterdiń múshelerin anyqtaý, esepke qoıý jáne ońaltýdaǵy josparlaryn aıtty. Bul Qoǵamdyq damý mınıstrligi, ÚEU jáne Astana ákimdigimen birlesip jasalyp jatqan jumys. Astana - turǵyndar sany únemi kóbeıip otyratyndyqtan pılotty qala retinde tańdalyp alyndy. Radıkaldy jáne basqa da jat dinı aǵymnyń ókilderi saýalnama arqyly anyqtalady.

«Ótken jyly Qazaqstan musylmandary rýhanı basqarmasynyń esebi boıynsha dástúrli ıslamǵa destrýktıvti dinı aǵymnyń 940 múshesi qaıtarylǵan. Biraq ókinishke qaraı ony rastaıtyn qujat joq. Biz qazir osy jumysty destrýktıvti dinı birlestikkke tartylǵandardyń árbirin rastaıtyn baza jasaǵymyz keledi. Onda biz qujat arqyly ol adamnyń dinı atrıbýttar taǵynyp júrse de dástúrli ıslamnyń ókili ekenin dáleldeı alamyz. Barlyǵyna bir ólshemmen qaraýǵa bolmaıdy. Shyn mánisinde kóbisi kádimgi dinı kıinip júretin musylmandar», - dedi A. Orazbaev.

Odan basqa, "Kontrterrorıstik komıteti" RQB basshysy dinge tartýdyń joldary týraly da aıtyp berdi. Negizinen, ol tanymal messendjer men saıttar arqyly júrgiziledi.

«Áleýmettik jeli arqyly aqparatty taratady. Jastar men tájirıbesi joq adamdar árıne, osy nasıhatqa eltip, ońaı beriledi, - dep jalǵastyrdy ol. Bizde Qazaqstan boıynsha qazirgi tańda aqparattyq-túsindirý jumystary jaqsy jolǵa qoıylǵan. Osy jumysty da qatar damytý kerek», - dedi A. Orazbaev.

Sonymen qatar, semınarda jat dinı aǵymnyń ókilderimen tıimdi jumys jasaýdy arttyrýǵa baǵyttalǵan mehanızmderdiń barysy talqylandy.