Astanada «Jasyl oram» qurylysy bastaldy

ASTANA. QazAqparat - Astanada «jasyl» tehnologııalar qoldanylǵan kvartal qurylysy bastaldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Jyljymaıtyn múlik qory» AQ Basqarma Tóraǵasy Bolat Palymbetov málimdedi.

Basqarma tóraǵasynyń sózine qaraǵanda, Qordyń uzaqmerzimdi damý strategııasyna sáıkes, «jasyl» tehnologııalardy qoldana otyryp, kommertsııalyq jyljymaıtyn múliktiń developmentin josparlaıdy. Bul baǵyttaǵy tuńǵysh ilki joba Astana qalasyndaǵy «Jasyl oram» qurylysy bolyp otyr. «Jasyl oram» - bul ozyq tehnologııalar qoldanyla otyryp salynǵan turǵyn úı men ákimshilik ǵımarattar kesheni. Onyń sáýlettik tujyrymdamasyn álemdegi jetekshi kompanııanyń biri bolyp tabylatyn brıtanııalyq «AIDAS» kompanııasy júzege asyrǵan. Ondaǵy ekologııalyq turǵyn úıler elektr qýaty men sýdy 20 paıyzǵa deıin únemdeıdi jáne «Jasyl oramnyń» barlyq ǵımarattary halyqaralyq standartpen sertıfıkattalyp, árbir nysannyń ózindik ekologııalyq pasporty bolady», - dedi B. Palymbetov.

Onyń aıtýynsha, osy joba arqyly «Samuryq-Qazyna» Jyljymaıtyn múlik qory» ekologııalyq qurylystyń jańa standarttaryna kóshýge serpin bermek. Al memlekettik-jekemenshik seriktestik negizindegi jobanyń quny 44 mlrd teńgeni quraıdy, al turǵyn úı men ákimshilik keshenniń jalpy aýmaǵy 180 myń sharshy metrden asady.

«Byltyr jerdiń daıyndyq jumystary júrgizildi, bıyl qurylys bastaldy. Ony aıaqtaý «EKSPO-2017» kórmesine deıin, ıaǵnı 2017 jylǵa qaarı josparlanyp otyr», - dedi B. Palymbetov.

Onyń sózine qaraǵanda, «jasyl» tehnologııa negizinde júzege asyp jatqan turǵyn úı áleýmettik sanatqa jatpaıdy, sondyqtan da onyń baǵasy arzan bolmaıdy.