Astanada jastarǵa 7 baǵytta tegin keńes beretin ortalyq jumysyn bastady

ASTANA. QazAqparat - Elorda jastary úshin túrli sala boıynsha tegin keńes beretin biryńǵaı baılanys ortalyǵy óz jumysyn bastady. Bul týraly «Astana jastary» memlekettik mekemesiniń basshysy Úkibaı Nurpeıisov QazAqparat tilshisine aıtyp berdi.

«Biz bıyl jastar jylyna oraı, biregeı joba ázirledik. Ol jastarǵa arnalǵan biryńǵaı 2019 nómerli call ortalyǵy iske qosyldy. Baılanys ortalyǵynyń maqsaty - jastardy jıi mazalaıtyn suraqtarǵa der kezinde jaýap berý. Odan bólek, tolyǵyraq keńes alǵysy kelse bizdiń ortalyqqa kelýge de bolady», - dedi ol.

Sonymen qatar, jastar ortalyǵynyń basshysy Astanada jastarǵa arnalǵan koýorkıng ortalyǵynyń ashylatynyn sóz etti.

«Búginde koýorkıng ortalyǵynyń jumys jospary ázirlenip, bekitýge jiberýge daıyn tur. Ol boıynsha elordada jańa ortalyq qurylatyn bolady. Onda jas býyn úshin túrli úıirmeler men sektsııalar jáne taǵy basqa. Sonymen qatar, olar úshin jumys isteý tegin ofıs jáne ınternetpen qamtamasyz etiletin bolady»- dedi Ú.Nurpeıisov.

Atalǵan Call-ortalyq 7 baǵytta, atap aıtqanda jumysqa ornalasý jáne bos jumys oryndary, bilim berý baǵdarlamalary, óz kásibin ashýǵa jáne damytýǵa arnalǵan baǵdarlamalar, baspana alýǵa arnalǵan baǵdarlamalar, tegin sport sektsııalary men túrli baǵyttaǵy úıirmeler, psıhologııalyq jáne zań týraly tegin keńes alý, erikti (volonter) bolý múmkindigi boıynsha jumys isteıdi.