Astanada jastardyń sany 300 myńǵa jýyqtady
Ashat Oralovtyń aıtýynsha, basqarma tarapynan jastardy memlekettik qoldaý sharalary men olardy elordanyń qoǵamdyq ómirine tartý jumysy qolǵa alynǵan. Bul jumys jeti baǵyt boıynsha júrgizilýde.
Jastarǵa kásibı baǵdar berip, jumysqa ornalastyrýǵa járdem kórsetý qazirgi tańdaǵy ózekti máselelerdiń biri. Bul kúnderi elimizde ártúrli tehnıkalyq mamandar tapshy ekeni málim. Osy olqylyqtyń ornyn toltyrý maqsatynda Astana jastaryna jyl saıyn qala kásiporyndaryna ekskýrsııalar uıymdastyrylýda. Máselen, byltyr «Tsesna-Astyq» Kontserni» AQ, «Tulpar-Talgo» JShS, «StalTsınk» zaýyty, «Tselıngıdromash» kompanııasy syndy kásiporyndardy 5500 jas aralady. Bıyl bul jumys shıratylyp, atalmysh óndiris oshaqtarynda 12 myń jas boldy.
Buǵan qosa, jumysshy mamandyqtardy nasıhattaý, suranysqa ıe mamandyq ıelerimen kezdesýlerdi uıymdastyrý, kásibı baǵdar berý maqsatynda joǵary synyp oqýshylarynyń ata-analarymen jumys júrgizý qolǵa alynǵan.
Basqarmadan málim etkendeı, qazir eńbek naryǵynda ınjener-mehanık, elektrshi, montajshy, santehnık, slesar, sondaı-aq densaýlyq saqtaý, bilim berý, qyzmet kórsetý salalarynyń mamandary suranysqa ıe.
Balalar men jastardyń demalysyn uıymdastyrý men soǵan jaǵdaı jasaý, shyǵarmashyl jastardy jáne jastardyń bastamalaryn qoldaý, jastardyń arasynda quqyqbuzýshylyqtyń aldyn alý, áleýmettik álsiz toptarǵa jatatyn jastarǵa kómek berý, volonterlik qozǵalysty damytý syndy jumystar bir-birimen sabaqtasyp jatyr. Sondaı-aq, «Rýhanı jańǵyrý» baǵdarlamasynyń aıasynda da birqatar sharalar atqarylýda.
Elordada Jastar saıasaty máseleleri jónindegi basqarmaǵa qarasty 18 aýla klýby jumys istep tur. Almaty aýdanynda - 10, Saryarqa aýdanynda - 5 jáne Esil aýdanynda - 3. Aldaǵy ýaqytta taǵy 6 klýbtyń ashylýy josparlanǵan. Basqarma basshysynyń sózinshe, sporttyq nysandarmen Astananyń shetki aımaqtaryn da qamtý oılastyrylǵan.
«Qalada jastar saıasatyn júzege asyrýdyń mańyzdy baǵyttarynyń biri - stýdentter men jumysshy jastardy biriktirý. Bul maqsatta aǵymdaǵy jyldyń basynan joǵary oqý oryndaryndaǵy Jastar isi jónindegi komıtet kóshbasshylaryn jáne elordanyń barlyq stýdentterin biriktiretin «A14» alańy quryldy. Mundaǵy «A» - Astanany, 14 - elordanyń joǵary oqý orydarynyń sanyn bildiredi. Osy jumys barysynda aı saıyn resmı, beıresmı kezdesýlerdi uıymdastyramyz. Bul arqyly Astanadaǵy joǵary oqý oryndarynda oqıtyn 51 myń stýdenttiń jaǵdaıyn bilip otyramyz», - deıdi Ashat Oralov.
Osy úlgimen qalanyń kolledj stýdentteriniń basyn qosatyn «A35», mektep kóshbasshylarynan quralǵan «A84» alańdary quryldy. Bul alańdardyń jumysy ótken qyrkúıek aıynda bastaldy.