Astanada jasandy ıntellekt qyzmet kórsetetin HQKO ashylady

ASTANA. QazAqparat - «Azamattarǵa arnalǵan úkimet» memlekettik korporatsııasy» kommertsııalyq emes AQ tóraǵasy Abylaıhan Ospanov elordada ashylatyn Elektrondy qyzmet ortalyǵy týraly aıtyp berdi, dep habarlaıdy QazAqparat tilshisi.

Tóraǵanyń aıtýynsha, Elektrondy qyzmet ortalyǵy - Halyqqa qyzmet kórsetý ortalyqtarynyń jańa túrine aınalmaq.  
«Elektrondy qyzmet ortalyǵynda «tiri» operator bolmaıdy, tek qana jasandy ıntellekt jumys isteıdi. Vırtýaldy keńesshi Aısana anyqtama alýdyń joldaryn kórsetip, qajetti sektorǵa baǵyttaıtyn bolady. Munda «M-gov» mobıldi qosymshasynyń múmkindikterimen tanysýǵa, uıaly baılanys operatoryn aýystyrýǵa, nómir alýǵa jáne elektrondy tsıfrlyq qoltańbany SIM-kartaǵa jazýǵa bolady», - dedi A. Ospanov.

Jańa ortalyqta turǵyndar júrgizýshi kýáligin alý úshin aldyn ala synaqtan óte alady jáne «digitaldrive» qondyrǵysy arqyly ekstremaldy jaǵdaılarda kólik júrgizýge mashyqtanady. Mundaı qabiletti shynaıy avtokólikpen kórsetý múmkin emes.

«Ortalyqta «Videocallroom» qyzmeti de bar, bul arqyly turǵyndar memlekettik organdardyń birinshi basshylaryna beıneúndeý qaldyrady.  Óz kezeginde basshylar ótinim berýshiniń elektrondy poshtasyna 15 kúnde jaýap joldaýlary tıis. Jáne barshaǵa qoljetimdi oryndar arqyly turǵyndar elektrondy úkimetten bıometrııalyq derekter, elektrondy-tsıfrlyq qoltańba nemese bir rettik qupııasóz arqyly aqparattyq anyqtamanyń 44 túrin shyǵara alady», - dep óz sózin tolyqtyrdy spıker. 

Odan bólek, turǵyndardyń tsıfrlyq saýattylyǵyn arttyrý maqsatynda ortalyqta bekitilgen keste boıynsha oqytý semınarlary uıymdastyrylady jáne oqytý qorytyndysy boıynsha sertıfıkattar beriledi.