Astanada jas aqyndar men termeshilerdiń baıqaýy ótedi
Sharanyń maqsaty - Táýelsizdik pen memlekettiliktiń mańyzdylyǵyn jas urpaqtyń sanasyna sińirý arqyly olardy otansúıgishtikke, eljandylyqqa baýlý. Shyǵarmashyl jastardyń ónerine qoldaý kórsete otyryp, memlekettik tildiń qoldanys aıasyn keńeıtý, óleń-sóz qudyreti arqyly qazaq tiliniń mártebesin kóterý.
Músháıra men baıqaýdyń sharttary boıynsha sharalarǵa 16-30 jas aralyǵyndaǵy úmitkerler qatysa alady. Kesh barysynda aldyn-ala iriktelip alynǵan jastar Táýelsizdikke arnalǵan jáne erkin taqyryptaǵy týyndylaryn oqıdy, jyr-termelerin oryndaıdy. Shara barysynda tanymal ónerpazdar da óner kórsetedi.
Keshti tanymal aqyn Qalqaman Sarın, belgili aıtysker aqyn Serikzat Dúısenǵazy júrgizedi. Saıys qorytyndylary boıynsha jeńimpazdarǵa arnaıy júldeler men dıplomdar tapsyrylady. Jyr dodasyna belgili ádebıetshi, Qazaq jáne shyǵys ádebıettaný ǵylymdarynyń salystyrmaly praktıkalyq negizin qalyptastyrýshy Іlııas Rysbekuly, aıtysker aqyn, Qazaqstannyń Eńbek sińirgen qaıratkeri Amanjol Áltaı, aqyn, «Shabyt» halyqaralyq jastar festıvaliniń laýreaty Asylzat Arystanbek jáne jyr-terme baıqaýyna QR mádenıet qaıratkeri, Qazaq ulttyq óner ýnıversıtetiniń janyndaǵy Qorqyt ata atyndaǵy ǵylymı-zertteý ınstıtýtynyń qazaq aqyndary, jyraý, sheshendik óner zerthanasynyń jetekshisi, professor Amandyq Kómekuly, QR mádenıet qaıratkeri, belgili ánshi Klara Tólenbaeva, aqyn, «Abaıtaný» ortalyǵynyń dırektory Almahan Muhametqalıqyzy qazylyq etedi.
Atalǵan rýhanııat keshine Jazýshylar odaǵynyń músheleri, belgili qalamgerler, ǵalymdar, zııaly qaýym ókilderi, jas aqyndar, belsendi jastar jáne t.b. shaqyrylǵan.
Shara 21 qarasha kúni saǵat 15.30-da «Tilep» qobyz saraıynda (Kereı, Jánibek handar kóshesi, 18) bastalady.