Astanada jas aqyndar aıtysy ótedi

ASTANA. QazAqparat - Elordada «Rýhanı jańǵyrý» baǵdarlamasy aıasynda Táýelsizdik kúni men Tuńǵysh Prezıdent kúnine arnalǵan jas aqyndar aıtysy ótedi, dep habarlaıdy Astana qalasy ákimdiginiń medıa ortalyǵy.

Astana qalasynyń ákimdiginiń Tilderdi damytý basqarmasynyń muryndyq bolýymen erteń, 22 qarashada «Jastar» saraıynda «Táýelsizdigim - teńdigim, Egemendigim - eldigim» atty jas aqyndar aıtysy ótetin bolady. Oǵan elimizdiń Almaty, Arqalyq, Semeı, Qyzylorda, Pavlodar, Shymkent qalalary men Torǵaı, Shyǵys Qazaqstan óńirinen 9 aıtysker aqyn qatysady dep kútilýde.

Aıtys barysynda aqyndar «Táýelsizdigim - tuǵyrym»; «Alashym - ardaǵym»; «Rýhanı jańǵyrý - muratym»; «Týǵan jer - turaǵym»; «Tilim - tumarym» taqyryptary boıynsha sóz jarystyratyn bolady. 

«Aıtysty ótkizýdiń maqsaty aqyndardyń óreli óneri, órnekti sózderi arqyly Táýelsizdik murattary men qundylyqtaryn nasıhattaý; el egemendigi jolyndaǵy Elbasynyń atqarǵan ıgi isterin ulyqtaý; «Rýhanı jańǵyrý» baǵdarlamasynyń mańyzdylyǵyn pash etý; óskeleń urpaqty otansúıgishtikke tárbıelep, olardyń tanym-talǵamyn ult rýhanııatyna baǵyttaý; qazaqtyń tól óneri, qudyretti sózi arqyly memlekettik tildiń mereıin arttyrý, qoldanys aıasyn keńeıtý bolyp tabylady», - dep jazylǵan taratylǵan habarlamada.

Aıtystyń qorytyndylary boıynsha jeńimpazdar Astana qalasy ákiminiń atynan dıplomdarmen jáne baǵaly syılyqtarmen marapattalady.