Astanada Japonııa elshisiniń qabyldaýy ótti
«Joǵary mártebeli ımperator osy jyldyń 23 jeltoqsan kúni 85 jasqa tolady. Imperatordyń týǵan kúnin sizdermen birge atap ótkim keldi. Eki el arasyndaǵy qarym-qatynas ártúrli salalarda jyl sanap artýda. Atap aıtsaq, bıyl maýsym aıynda Astanada ekonomıka salasyndaǵy yntymaqtastyq jónindegi Qazaqstan-Japonııa úkimettik jáne jeke sektorlary birlesken komıssııasynyń 7-otyrysy ótti. Otyrys barysynda ekonomıka, saýda, ınvestıtsııa máseleleri talqylanyp, ýaǵdalastyqtarǵa qol jetkizdi. Oǵan dálel Almaty men Astanada jańadan japon zaýyttary men mekemeleri ashylyp, birlesken kásiporyndar quryldy», - dedi Japonııanyń Qazaqstandaǵy elshisi Itıro Kavabata.
Elshi myrza aldaǵy ýaqytta atalǵan jumystardyń óz jalǵasyn tabatynyn aıta kele, 2020 jyly Tokıoda ótetin Olımpıada jáne paralımpıadalyq oıyndarǵa qatysty Qazaqstannyń qoldaý kórsetkenine alǵysyn bildirdi.
«Kelesi jyldyń qańtar aıynda dıplomatııalyq mindetimdi aıaqtap Japonııaǵa oralamyn. 2 jyl 9 aı boıy atqarǵan qyzmetim kezinde Japonııa men Qazaqstannyń ekijaqty qarym-qatynastardyń mańyzdy oqıǵalaryna kýá boldym. Sonyń biri - «Astana EKSPO-2017» halyqaralyq kórmesi. Qazaqstan halqyna jáne dıplomatııalyq qoǵamdastyqqa maǵan kórsetken qoldaýlary men dostyǵy úshin shynaıy alǵysymdy bildiremin», - dedi ol.
Óz kezeginde elimizdiń syrtqy ister vıtse-mınıstri Erjan Ashyqbaev eki el arasyndaǵy dıplomatııalyq qarym-qatynas ornaǵan 25 jyl ishinde el damýyna úles qosqan kóptegen mańyzdy oqıǵalardyń oryn alǵanyna toqtalyp ótti.
«Osy qysqa ýaqyttyń ishinde bizdiń ózara tıimdi strategııalyq yntymaqtastyǵymyz óz shyńyna jetip, ekijaqty saıası túsiniktiń joǵary deńgeıiniń arqasynda elderimiz arasyndaǵy ekonomıkalyq yntymaqtastyq qarqyndy damyp keledi. 2015 jyly Japonııa premer-mınıstri Sındzo Abeniń Qazaqstanǵa jasaǵan resmı sapary, sondaı-aq 2016 jyly Elbasy Nursultan Nazarbaevtyń Japonııaǵa jasaǵan sapary eki eldiń arasyndaǵy qarym-qatynastardy jańa belesterge shyǵardy. Bıylǵy ekijaqty saýda aınalymynyń kólemi 1,3 mlrd AQSh dollarynan asyp tústi. Investıtsııalyq ýaǵdalastyqtardyń nátıjesi retinde ústimizdegi jyldyń sońynda Japonııanyń bizdiń elimizge quıǵan tikeleı ınvestıtsııasynyń kólemi 1,2 mlrd AQSh dollaryna jetkenin atap ótýge bolady», - dedi ol.
Sonymen qatar, qabyldaý barysynda QR Parlamenti Májilisiniń depýtaty Nurlan Dýlatbekov pen «Astana medıtsına ýnıversıteti» AQ dırektorlar keńesiniń tóraǵasy Tólebaı Rahypbek Japonııa ımperatorynyń ordenimen, sondaı-aq, Nazarbaev ýnıversıtetiniń prezıdenti Shıgeo Katsý Japonııanyń syrtqy ister mınıstriniń qurmet gramotasymen marapattaldy.