Astanada janarmaı baǵasy qalaı túziletini túsindirildi

ASTANA. QazAqparat - Qazaqstandaǵy munaı ónimderiniń quny Ortalyq Azııa elderimen salystyrǵanda 30-40 paıyzǵa arzan. Bul týraly búgin Ortalyq kommýnıkatsııalar qyzmetindegi brıfıngte «QazMunaıGaz Ónimderi» JShS Bas dırektorynyń operatsııalyq basqarý boıynsha orynbasary Nurken Myrzaǵalıev málimdedi, dep habarlaıdy QazAqparat.

«Ortalyq Azııa elderindegi janar-jaǵarmaı qunyna sholý jasar bolsaq, eń arzan munaı ónimderiniń Qazaqstanda ekenin baıqaýǵa bolady. Máselen, Aı92 janarmaıynyń bir lıtri Reseıde 36,54 rýbl nemese 199,39 teńge, dızeldi otyn  209,05 teńge. Ózbekstanda Aı92 - 228 teńge, dızeldi otyn - 250 teńge. Qyrǵyzstanda Aı92 - 182 teńge, dızeldi otyn - 169 teńge. Tájikstanda Aı92   -228 teńge, dızeldi otyn - 222 teńge. Qazaqstanda Aı92 143 teńge bolsa, dızeldi otyn - 130 teńge. Salystyryp qarar bolsaq, bizdegi janar-jaǵarmaı quny kórshilerge qaraǵanda 30-40 paıyzǵa arzan», - dedi N.Myrzaǵalıev.

Al QR Energetıka vıtse-mınıstri Áset Maǵaýov munyń sebebin de túsindirip berdi: «Biz munaı ónimin Reseıden qosymsha qun salyǵynsyz satyp alamyz. Jáne munda QR Ulttyq ekonomıka mınıstrligi júrgizetin salyq saıasaty da erekshe rólge ıe», - dep atap ótti ol.

Sonymen birge, «QazMunaıGaz Ónimderi» JShS ókili Nurken Myrzaǵalıev «QazMunaıGaz» janarmaı beketterindegi baǵanyń qalaı túziletinin aıtyp berdi. Onyń aıtýynsha, janarmaı qunynyń 83 paıyzyn satyp alý baǵasy quraıdy, jetkizý quny, tasymaldaý 5 paıyz, janarmaı beketterin ustaý, saqtaý qyzmeti  11 paıyz bolsa, taza paıda 1 ǵana paıyzdy quraıdy.

«Baǵa eń birinshi kezekte kóterme jetkizýlerge tikeleı baılanysty. Sáıkesinshe, munaı barlaý kompanııalarynan alǵan ónim jetkiliksiz bolǵandyqtan, 25-30% munaıdy Reseı Federatsııasynan ımporttaýǵa májbúrmiz. Sol sebepti bizdegi baǵalar Reseı naryǵyndaǵy baǵamen tikeleı baılanysty», -  dep ol janarmaı baǵasynyń qymbattaý sebebin de túsindirip berdi:

«Jyl basynan beri shamamen 35 myń tonna Aı92 janarmaıyn ımporttadyq jáne aıyna 10-20 myń tonna ımporttaýdy jalǵastyryp kelemiz. Qazir qorda shamamen 40 myń tonna janarmaı qaldy. Bul sáýir aıynda naryqty úzdiksiz qamtamasyz etýge jetkilikti», - dep tolyqtyrdy N.Myrzaǵalıev.

Eske sala ketsek, búgin Ortalyq kommýnıkatsııalar qyzmetinde kóktemgi egis jumystaryn júrgizý úshin qazaqstandyq aýyl sharýashylyǵy taýarlaryn óndirýshilerdi baǵasy jeńildetilgen dızel otynymen qamtamasyz etý máselesine arnalǵan brıfıng ótti. Onda bıylǵy aýyl sharýashylyǵy taýarlaryn óndirýshilerge kóktemgi egistik jumystaryn júrgizý úshin 375 myń tonna arzandatylǵan dızel otynynyń jetkiziletini habarlandy.