Astanada jalǵan qońyraý saldarynan eki poıyz eski vokzalǵa jiberildi

ASTANA. QazAqparat - «Nurly Jol» vokzaly qalypty jaǵdaıda jumys isteýde, dep habarlaıdy «Qazaqstan temir joly» AQ baspasóz qyzmeti.

Búgin «102» telefon qyzmetine «Astana-Nurly jol» vokzalyna jarylǵysh zat qoıyldy degen qońyraý shalyndy. Atalmysh aqparatty vokzal ákimshiligine lańkestikke qarsy kúres ortalyǵy habarlap, jolaýshylar men vokzal qyzmetkerlerin syrtqa shyǵarýǵa týra keldi.

Aqparattyq júıe arqyly jolaýshylarǵa jedel túrde sabyr saqtap, ǵımarattan syrtqa shyǵý týraly habarlandy. Tótenshe jaǵdaı týǵandaǵy ózara is-qımyl josparyna sáıkes, jarylǵysh zattardy taýyp, zalalsyzdandyrý jónindegi quqyq qorǵaý organdarynyń qyzmetkerleri kelip jetti.

Jolaýshylar qaýipsizdigin qamtamasyz etý men jolaýshylar poıyzdarynyń keshigýin boldyrmaý úshin eki poıyz Astana-1 vokzalyna baǵyttaldy. №4 «Astana-Almaty-2» poıyzy 1 saǵat 11 mınýtqa keshigip attandy. Alaıda sońǵy stansaǵa kesteden keshikpeı jetý kózdelip otyr.

Qazirgi kezde «Astana-Nurly jol» vokzaly jumysyn qalypty jaǵdaıda jalǵastyrýda.