Astanada zańsyz mıgranttarǵa 1,8 mln teńgege aıyppul salyndy

ASTANA. QazAqparat - Astanalyq polıtseıler 18-20 qyrkúıek kúnderi aralyǵynda kóshi-qon salasyndaǵy zańnama buzýshylyqtaryn anyqtaýǵa baǵyttalǵan «Mıgrant» jedel-aldyn alý is-sharasyn ótkizdi, dep habarlaıdy QazAqparat elordanyń medıa ortalyǵyna silteme jasap.

Shetel azamattary zańsyz ornalasýy múmkin oryndar, qurylys nysandary, adamdar kóp shoǵyrlanatyn jerler, ásirese bazarlar men vokzal mańy aýmaǵy, ónerkásip aımaqtary tekserildi.

Astana qalalyq ІІD Kóshi-qon polıtsııasy basqarmasynyń bastyǵy Erketaı Týtkýshevtiń derekteri boıynsha, atqarylǵan jumystar nátıjesinde kóshi-qon zańnamasyn buzýdyń 449 faktisi anyqtaldy.

Astana qalasynyń Mamandandyrylǵan aýdanaralyq ákimshilik sotymen elden 52 adam, onyń ishinde azamattyq sot óndirisiniń tártibinde 1 adam  shyǵaryldy.

249 shetel azamatyna el aýmaǵynda bolý merzimderi qysqartyldy. Qalanyń qabyldap-taratý ornyna TMD-nyń 90 azamaty jetkizildi. Іzdeýde bolǵan bir qylmysker ustaldy.

Sotqa deıingi tergeýdiń biryńǵaı tizilimine QR QK-niń 393-baby boıynsha elden alastatý týraly sot sheshimin oryndamaýǵa qatysty 13 qylmystyq is tirkelgen. ІІB esebine 369 adam qoıyldy. 

«Reıd kezinde barlyǵy 1,8 mln. teńgeden astam somaǵa aıyppul salyndy, olardyń ishinde shamamen 1,3 mln. teńgesi óndirilip alyndy», - dep málimdedi Erketaı Týtkýshev.