Astanada Vetnam mádenı ortalyǵy ashylýy múmkin

ASTANA. QazAqparat - Qazaqstandyq tanymal kásipker Oralbek Botbaı Vetnam Úkimetiniń janyndaǵy dostastyq uıymdary birlestiginiń «Álemdegi beıbitshilik pen halyqtar arasyndaǵy dostyqty nyǵaıtýdaǵy qosqan úlesi úshin» medalimen marapattaldy, dep habarlaıdy QazAqparat.

Marapattaý rásiminde sóz alǵan birlestiktiń vıtse-prezıdenti Bui Khac Son eki eldiń arasyndaǵy tarıhı jáne týysqandyq baılanys jaıly aıta kelip, byltyr ǵana eki eldiń dıplomatııalyq qarym-qatynas ornatqanyna 25 jyl tolǵanyn atap ótti. Ekonomıkalyq baılanystan bólek, mádenı jáne áleýmettik qatynastardyń orny erekshe ekenine basa mán berdi.

«Oralbek Qojamjarulynyń (Botbaı - red.) Vetnam Sotsıalıstik Respýblıkasynyń Qazaqstandaǵy dostyq saıasatyn júrgizýdegi orny zor. Astanaǵa Elshi bolyp taǵaıyndalǵanyma úsh jylǵa jýyqtady. Osynsha ýaqyt ishinde qanshama ıgi isterdi atqaryp, Qazaqstan ekonomıkasyna ınvestıtsııa tartýmen aınalystyq», - dedi sharaǵa arnaıy kelgen Tótenshe jáne Ókiletti Elshi Doan Thı Sýan Hıen. Sondaı-aq, marapattaý rásimine VSR SІM ókilderi men dostastyq uıymynyń Eýropa jáne Azııa departamentiniń dırektory Pham Thi Thai qatysty.
 

Óz kezeginde sóz alǵan O.Botbaı Elbasy N.Á.Nazarbaevtyń kópvektorly syrtqy saıasatynyń sátti júzege asyp otyrǵanyn aıtyp, otandyq kásipkerlerdiń syrtqy naryqty ıgerip, el ekonomıkasyna tyń serpilis ákelý qajet dedi.

Aıta ketetin jaıt, shara sońynda ol Astanada Vetnam mádenı ortalyǵyn ashyp, ekonomıkasy kún sanap ilgerilep bara jatqan «Azııa jolbarystarynyń» biri sanalatyn eldiń tilin meńgerý úshin qazaqstandyq jastarǵa dáris oqıtyn vetnamdyq til oqytýshysynyń shyǵynyn kóterýge ázir ekenin málimdedi.

Sonymen qatar, munan ózge de túrli iskerlik kezdesýler uıymdastyrylyp, otandyq kásipkerler men vetnamdyq isker top birlese otyryp, bıznes bastamaqqa ýaǵdalasty.