Astanada úzdik saýynshylar baıqaýyna qatysqandardyń 80 paıyzy er adamdar boldy

ASTANA. QazAqparat - Astanada Ortalyq Azııadaǵy KazAgro jáne KazFarm iri salalyq kórmeleri ótip jatyr, dep habarlaıdy QazAqparat.

Kórme aıasynda «Úzdik saýynshy» baıqaýy ótkizilip, oǵan nıet tanytqan adamdardyń barlyǵy qatysty.

Básekelesterdiń tájirıbesi de, jynysynyń da mańyzy bolǵan joq. Uıymdastyrýshylardy tań qaldyrǵany, baıqaýǵa qatysýshylardyń 80 paıyzy er adamdar boldy.

Shart boıynsha qatysýshylar 2 mınýt ishinde eń kóp sútti saýýy kerek edi. Júlde – aýylsharýashylyq ónimderinen jınalǵan bir býket jáne 25 kg un.

Erler arasynda kórmege Aqmola oblysynan kelgen Aıaz Jeńisov jeńimpaz atandy.

«Men sút fermasynda brıgadır bolyp jumys istedim. Biraq kásiporynda mashınamen saýatyn bolǵandyqtan, óz basym eshqashan sıyr saýyp kórgen emespin. Osyndaı baıqaýdyń ótip jatqanyn kórip, kóńil kóterý úshin qatysýdy jón kórdim. Bir tań qalǵanym, 820 ml sút saýyp, jeńiske jettim», - deıdi ol.

Áıelderdiń arasynda kórmeden habar taratýǵa kelgen «Qazaqstan» telearnasynyń jýrnalısi Áıgerim Hamıt jeńimpaz atandy.

«Buryn bir-eki ret sıyr saýýǵa tyrystym. Biraq baı tájirıbem bar nemese shebermin dep aıta almaımyn. Naǵyz sıyrda emes, apparatta jarysqandyqtan biraz qıyn boldy. Biraq tutastaı alǵanda qyzyq jáne kóńildi ótti», - dedi jeńimpaz.

Eske salaıyq, 12-14 qazanda Astanada Ortalyq Azııadaǵy eń iri agroónerkásiptik KazAgro/KazFarm-2022 kórmeleri ótip jatyr.

Іs-sharaǵa 20-dan astam elden 300-den astam túrli kompanııalar men uıymdardyń ókilderi qatysýda. Olardyń qatarynda Qazaqstan, Germanııa, Túrkııa, Belarýs, Reseı, Avstrııa, Ispanııa, Italııa, Iran, Izraıl, Qytaı, Kanada, Polsha, Shvetsııa jáne basqa elderdiń ókilderi bar.

Kórmeniń jalpy aýmaǵy 20 myń sharshy metrdi qurady. Sharanyń uıymdastyrýshysy – ExpoGroup kompanııasy.