Astanada úzdik qazaqtildi saıttar marapattaldy
Internet júıesindegi úzdik qazaqtildi resýrstardy anyqtap, olarǵa qoldaý bildirýdi kózdeıtin «QR Tuńǵysh Prezıdenti - Elbasy qory men Memlekettik tildi damytý qorynyń Úzdik qazaqtildi ınternet-saıt syılyǵy» baıqaýy bıyl ekinshi ret uıymdastyrylyp otyr.
Baıqaýǵa ınternettegi tájirıbesi keminde bir jyldy quraıtyn, qazaq tilinde aqparat taratatyn úkimettik emes, táýelsiz qoǵamdyq saıttar qatysa alady jáne bıyl respýblıkanyń túrli aımaqtarynan 33 ótinim kelip túsken.
Qazylar alqasy saıttardy mazmuny, qyzmet baǵyty, ınteraktıvtiligi, qazaq tili men ulttyq qundylyqtardyń dáriptelýi, patrıottyq taqyryptardyń úzdiksiz kóterilýi, kórkemdik jaǵy, ıdeıa ereksheligi syndy talaptar boıynsha saralaǵan.
Osylaısha, baıqaýdyń «Ótkir til» - memlekettik til men ulttyq qundylyqtardy nasıhattaýshy úzdik saıt retinde «www.zheruiyq.kz» saıty jeńimpaz dep tanyldy. QR Tuńǵysh Prezıdenti - Elbasy Qorynyń atqarýshy dırektorynyń orynbasary Sultan Aıtjanov jeńimpaz saıt redaktoryna dıplom men 385 myń teńgelik sertıfıkatty tabys etti jáne jekelegen baǵyttar boıynsha áli de qazaqtildi saıttardyń jetispeýshiligi baıqalatynyn basa aıtty.
«Bıyl júldemizdiń sany kóbeıdi, qatysýshylardyń sany artty. Osy oraıda, biz nazar aýdaratyn eki másele bar: bıyl eki júldeni - «Balalarǵa arnalǵan úzdik memlekettik emes qazaqtildi saıt» jáne «Aımaqtyq úzdik memlekettik emes qazaqtildi saıt» atalymdaryn nazarsyz qaldyryp otyrmyz. Sebebi Qazaqstanda dál osy nomınatsııalarǵa saı keletin qazaqtildi resýrs joq. Bul másele barshamyzdy oılandyrýy tıis», - deıdi Sultan Aıtjanov.
Baıqaýdyń «Rýhanı azyq» atalymy boıynsha «Qamshy.kz» saıty úzdik dep ataldy. Júldeni QR Parlamenti Májilisiniń depýtaty Baqytbek Smaǵul tabystady jáne qazaq jastaryna arnalǵan júrekjardy óleńin oqyp berdi.
«Tereń izdenis» nomınatsııasynyń júldesin «247media.kz» saıty jeńip aldy. «247media.kz» - ádebıet, tarıh, álem jańalyqtary jóninde materıal jarııalaıtyn qazaqtildi resýrstardyń biri.
«Shynaıy ómir» atalymy boıynsha «kerekinfo.kz» portaly úzdikterdiń qatarynan tabyldy. Kezekti marapatty tabys etken «QazAqparat» HAA Bas dırektorynyń keńesshisi Mahat Sadyq zamannyń kóz ilespes jyldamdyqpen ózgerip jatqanyn atap ótti jáne jeńimpaz saıt ıelerine robottyń ózi almastyra almaıtyn ıntellektýal bolýǵa keńes berdi.
«Sport tynysy» atalymy boıynsha eki resýrs qatarynan jeńimpaz atandy. Nátıjesinde ulttyq sportty nasıhattaıtyn ulttyqsport.kz jáne qazaq tilinde sport jańalyqtaryn taratatyn alzhan.kz saıttary marapattaldy.
«Bilim bulaǵy» atalymy boıynsha da kaz-tili.kz jáne qaztest.kz saıttary jeńiske jetti.
Bir aıta keterligi, jeńimpaz atanǵan kaz-tili.kz saıtyn baǵdarlamashy Tatıana Valıaeva 10 jyl buryn ashqan jáne búginge deıin ózge ult ókilderine qazaq tilin úıretip kelgen.
«Jastar álemi» atalymy boıysha zhasatyrau.kz jáne «Oıyn-saýyq» atalymy boıynsha - baribar.kz saıttary marapattaldy.
Aıta keteıik, QR Tuńǵysh Prezıdenti - Elbasy qory men Memlekettik tildi damytý qory qazaq tilin nasıhattaýǵa qatysty birqatar birlesken jobalardy júzege asyryp keledi.
Atap aıtqanda, 2016 jyldyń qyrkúıek aıynda Soyle.kz ádistemesi boıynsha qazaq tilin Skype arqyly oqytý jobasyn bastalsa, bıyl «Qazaqstan3D» veb-saıty men mobıldi qosymshasyn jáne «Jeti qazyna» entsıklopedııalyq qosymshasy tanystyryldy.