Astanada úzdik áleýmettik jobalar anyqtaldy
Bıyl sáýirde «Qazaqstannyń úzdik áleýmettik jobalary» baıqaýy jarııalandy. Bul baıqaý «Nur Otan» partııasy men Eńbek jáne halyqty áleýmettik qorǵaý mınıstrligi, qalalyq ákimdik pen bıznes qaýymdastyqtardyń qoldaýymen júzege asyryldy. Shara bıyl osymen besinshi ret ókizildi. Osy oraıda, 20 sáýir men 30 maýsym aralyǵynda partııanyń Astana qalalyq fılıalyna baıqaýǵa qatysýǵa nıet bildirgen uıymdardan 20-dan astam ótinish kelip tústi.
«Nur Otan» partııasy Astana fılıaly tóraǵasynyń orynbasary Vladıslav Sergeevtiń aıtýynsha, jobalar negizine maqsatty aýdıtorııalarǵa arnalǵan. Jyl saıyn baıqaýǵa qatysýshylar sany artyp keledi.
«Máselen, ótken jyldary 7-8 joba bolsa, bıyl 20-ǵa jetti. Endi aldaǵy jyly olardyń sany 40-qa jetetinin senimmen aıta alamyn», - dedi V. Sergeev.
Sonymen, úshinshi oryndy «Olımpıonık» áleýmettik qory» QQ jeńip aldy. Joba «Bizdiń aýlanyń chempıondary» dep atalady. Qordyń maqsaty - balalar arasynda sportty keńinen nasıhattaý.
Al ekinshi oryn «GreenTAL» áleýmettik sheberhanasyna buıyrdy. Kásiporyn bólme jıhazdaryn, aǵashtan jasalǵan túrli buıymdardy jasaý, kıim toqý isimen aınalysady. Osy jerde jumys isteıtin 40-qa jýyq qyzmetkerdiń jartysynan astamy áleýmettik jaǵynan az qamtylǵan adamdardy quraıdy.
Baıqaý jeńimpazy ataǵy «Ardager» QQ-ǵa berildi. 20 jyl qatarynan belsendi jumys istep kele jatqan qoǵamdyq qor kórsetetin qoldaý qyzmeti tegin júzege asyrylady. Osy oraıda zeınetkerler men qart adamdarǵa qoldaý sharalary turaqty júrgizilýde.