Astanada úsh myńǵa jýyq jarnamalyq mańdaısha alynyp tastaldy

ASTANA. QazAqparat - Jyl basynan beri elordanyń bes aýdanynda úsh myńǵa jýyq jarnamalyq bılbord, mańdaısha men jarnamalar alynyp tastaldy. Bul jumys qalanyń syrt kelbetin dızaın-kodqa sáıkestendirý maqsatynda júrgizilip jatyr, dep habarlaıdy QazAqparat Astana ákimdiginiń resmı saıtyna siltep.

Ǵımarattardyń qasbetinen dızaın kodqa sáıkes kelmeıtin jarnamalyq belgiler men bannerler alynyp tastalady. Astana turǵyndary mundaı ózgerister qalany ádemi ári zamanaýı etedi dep sanaıdy.

Jyl basynan beri elordada úsh myńǵa jýyq banner, jarnamalyq belgi, onyń ishinde qalanyń dızaın kodyna sáıkes kelmeıtin dóńgelekterdegi jarnamalar alynyp tastaldy.

«Men qalamyzdyń kelbeti kúnnen kúnge qulpyryp kele jatqanyna qýanamyn, ol bir standartqa aınalyp keledi, mańdaıshalar alynyp tastalady, bul bizdiń úıdi ǵana emes, qalany da qulpyrta túsedi», – dep esepteıdi astanalyq Aıman Turdahınova.

«Jaqsy jumystar júrgizilip jatyr, qalanyń syrt kelbeti retke keltirilýde. Óte durys dep sanaımyn», – dedi elorda turǵyny Nurman Rahımov.

Aıta keteıik, bes aýdan ákimdiginiń qyzmetkerleri zańsyz jáne sáıkes kelmeıtin jarnamanyń dızaın kodyn túsindirý jáne alyp tastaý boıynsha kóshpeli is-sharalar ótkizedi.

Kásipkerlermen tıisti áńgimeler júrgiziledi, dızaın kodqa sáıkes kelmeıtin mańdaıshalardy aýystyrý qajettiligi týraly býkletter beriledi.

Aıta keteıik, 2023 jyldyń qańtar aıynda Astanany damytý máseleleri jónindegi keńeste Prezıdent Qasym-Jomart Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtýdi tapsyrǵan bolatyn.