Astanada úsh kúnde 45 mekeme karantın talaptaryn buzǵan

NUR-SULTAN. QazAqparat – Elordanyń monıtorıngilik toptary táýlik boıy kúsheıtilgen rejımde qalanyń kásipkerlik nysandarynda karantın talaptarynyń saqtalýyn tekserýde, dep habarlaıdy QazAqparat Nur-Sultan ákimdiginiń resmı saıtyna silteme jasap.

Kún saıyn ondaǵan mekemede shekteý sharalary buzylǵany anyqtalady. Ádette, olardyń sany demalys kúnderi tipten artyp ketedi,

Almaty aýdanynda monıtorıngilik toptar «Kısh Mısh» dámhanasynda, «ChBD» túngi klýbynda, «Panaehalı» jáne «Sova» barlarynda karantın rejıminiń saqtalmaǵanyn tirkeldi.

Qoǵamdyq tamaqtaný oryndary úshin belgilengen jumys kestesi Esil aýdanynda ornalasqan «Lavash Food» jáne «Bobber Bri» jyldam tamaqtaný nysandarynda, sondaı-aq «Pavilion» meıramhanasynda saqtalmaǵan. Sonymen qatar, qyzmetkerler men kelýshiler maska rejımin elemegeni anyqtaldy.

Saryarqa aýdanynda karantın buzýshylar tizimine «El plaza» meıramhanasy, «Karıma» kafesi, «Kega mucic bar» bary endi.

Sondaı-aq, Baıqońyr aýdanynda ornalasqan «Xalva» meıramhanasynda shekteý sharalary saqtalǵan joq.

Osylaısha, 6-8 tamyz aralyǵyndaǵy úsh kúnde Nur-Sultanda 45 mekeme karantındik shekteýlerdi buzdy.

Eske salaıyq, demalys kúnderi qoǵamdyq tamaqtaný nysandaryna kelýshilerdi qabyldaýǵa tyıym salynady. Osyǵan qaramastan, keıbir kafeler men meıramhanalar esikterin jaýyp alyp toı ótkizgen.

Tártip buzýshylarǵa qatysty jınalǵan materıaldar tıisti sharalar qabyldaý úshin sanıtarlyq-epıdemıologııalyq baqylaý salasyndaǵy ýákiletti organǵa berilgen.

Búgingi kúni Nur-Sultanda epıdemıologııalyq jaǵdaı turaqsyz, táýlik saıyn qalada KVI juqtyrýdyń 1200 jaǵdaıy anyqtalady, aýrýhanalarǵa koronavırýstyń ortasha jáne aýyr aǵymy bar 300-ge deıin adam túsedi. Osyǵan baılanysty elorda turǵyndary men qonaqtary, sondaı-aq kásipkerlik nysandary sanıtarlyq normalardy jáne karantın rejıminiń talaptaryn múltiksiz saqtaýy, adam kóp jınalatyn oryndardan aýlaq bolýy tıis.