Astanada úsh birdeı kassatsııalyq sot qurylady

<p>ASTANA. KAZINFORM — Májilis depýtattary keıbir zańnamalyq aktilerge sot júıesin reformalaý jáne protsestik zańnamany jetildirý máseleleri boıynsha ózgerister men tolyqtyrýlar engizýdi kózdeıtin zań jobasyn birinshi oqylymda maquldady.</p>

Zań jobasy Qylmystyq-protsestik kodekske, Azamattyq protsestik kodekske, Ákimshilik rásimdik-protsestik kodekske jáne taǵy birqatar basqa zańǵa túzetý engizýdi kózdeıdi.

Májilistegi zańnama jáne sot-quqyqtyq reforma komıtetiniń tóraıymy Snejanna Imashevanyń aıtýynsha, Joǵarǵy sottaǵy kassatsııalyq satynyń qazirgi úlgisi azamattardyń suranysyn tolyq qanaǵattandyrmaıdy. 

«Qazir azamattyq ister boıynsha túsken shaǵymdy bir sýdıa qarap, ony úshtikke berý nemese bermeý týraly birjaqty sheshim qabyldaıdy. Saldarynan azamattyq jáne qylmystyq isterdiń tek 5%-y ǵana kassatsııalyq qaıta qaraýǵa jetedi. Jańa model elordada úsh kassatsııalyq sotty, ıaǵnı qylmystyq, azamattyq jáne ákimshilik ister boıynsha sottardy qurýdy kózdeıdi», — dedi depýtat.

Osy zań jobasyn pysyqtaǵan jumys tobynyń qaraýyna mynandaı usynystar engizilgen: 

— kassatsııaǵa ister aldyn ala qaraýsyz úsh sýdıadan turatyn alqaǵa tikeleı túsetin bolady;
— kassatsııalyq sotta isterdi qaraý merzimi 6 aıdan aspaıdy;
— sot protsesi taraptardy shaqyra otyryp, aýyzsha júrgiziledi.

«Kassatsııalyq sottardyń qurylýymen Joǵarǵy cottyń róli de ózgeredi. Onyń jumysy sot praktıkasynyń birkelkiligin qamtamasyz etýge baǵyttalady. Sot aktilerin Joǵarǵy sot sýdıasynyń usynýy boıynsha erekshe jaǵdaılarda Joǵarǵy sotta qaıta qaraý múmkin bolady. Usynylǵan jańa mehanızm Joǵarǵy sot tóraǵasynyń usynysy ınstıtýtyn aýyrtpalyqsyz joıýǵa múmkindik beredi. Reformanyń irgeli sıpatyn eskere otyryp, ony iske qosý merzimin 2025 jyldyń 1 shildesinen bastap iske asyrý usynylady. Jańa sot reformasy qoldanystaǵy shtat sanyn keńeıtýsiz jáne qosymsha qarjylyq shyǵyndarsyz júzege asyrylady», — dedi Snejanna Imasheva.