Astanada Uly Otan soǵysynyń qatysýshylary, penıtentsıarlyq júıeniń ardagerleri óz meken-jaılaryna quttyqtaýlar aldy

ASTANA. Mamyrdyń 4-i. QazAqparat /Ǵalymjan Hasenov/ - Jeńistiń 65 jyldyq mereıtoıyn atap ótý aıasynda búgin Astana qalasynda turatyn Uly Otan soǵysyna qatysýshylar, penıtentsıarlyq júıeniń ardagerleri óz meken-jaılaryna quttyqtaýlar aldy, dep habarlaıdy Ádilet mınıstrligi QAJ komıteti baspasóz qyzmeti.

Vedomstvo baspasóz qyzmetiniń ókili Samal Ǵadilbekovanyń aıtýynsha, is-sharany QAJ Komıteti ardagerler keńesi jáne QAJK Astana qalasy boıynsha basqarmasymen birlese otyryp ótkizdi.

QAJ qyzmetkerleri soǵysqa qatysqan úsh ardagerdiń úıinde boldy. Olar Alekseı Danılovıch Mejýev, Ivan Fedorovıch Dobryshın jáne Vıacheslav Dmıtrıevıch Lomako.

Aqmola oblysy, Shortandy aýdanynyń týmasy 88 jastaǵy A.D.Mejýev soǵysqa 1941 jyldyń shildesinde attanǵan, Máskeý túbindegi shaıqasqa qatysqan.

Aqmola oblysy Preobrajenskoe aýylynyń týmasy I.F.Dobryshın - burynǵy vzvod komandıri, Belarýs pen Polshany azat etýge qatysqan.

Soǵys bastalǵanda V.D.Lomakonyń Belarýstyń Mınsk aýdanynda ornalasqan týǵan aýyly Dýbovıtskaıa Sloboda Gıtler áskerleriniń qorshaýynda qalǵan, dep eske alady ardager. Jasóspirim fashıstik Germanııanyń aýyr jumysyna barmas úshin, aýylynan qashyp partızandyq otrıadqa kelip qosylǵan, ol jerde otrıad Keńes Odaǵynyń áskerine qosylǵanǵa deıin, ıaǵnı 1944 jylǵa deıin soǵysqan.

Gúl men alǵys sózderinen basqa, ár ardagerge materıaldyq kómek, arnaıy plakattar men syılyqtar berildi, eń bastysy - burynǵy áriptesteriniń atynan alǵys pen yqylasqa bólendi, dep atap ótti Samal Ǵadylbekova.