Astanada ulttyq kıim kıgender mýzeıge tegin kiredi

ASTANA. QazAqparat - QR Ulttyq mýzeıi Naýryz meıramyna oraı uıymdastyrylatyn merekelik is-sharalar tizbegin usynady, dep habarlaıdy QazAqparat.

19 naýryz kúni saǵat 11.00-de «Naýryz - jańarý nyshany» merekelik shoý-baǵdarlamasy bastalady.

«Naýryz - tabıǵat-ana men adamzat birliginiń, halyqtar arasyndaǵy ózara túsinistik pen dostyqtyń meıramy. Shara barysynda ata-ana qamqorlyǵynan aırylǵan sábıler úshin «Tusaýkeser» rásimi ótedi. Elimizdiń tanymal tulǵalary №2 mamandandyrylǵan balalar úıinen arnaıy kelgen sábılerdiń tusaýyn kesedi. Ulttyq mýzeıdiń «Tusaýkeser» qaırymdylyq jobasy bıyl tórtinshi ret uıymdastyrylyp otyr. Sodan soń, kontserttik baǵdarlama jalǵasyn taýyp, teatrlandyrylǵan qoıylym, aıtys óneri, án, bı, arqan tartys, kıiz basý jáne qolóner boıynsha sheberlik sabaqtary ótedi», - dep habarlady QR Ulttyq mýzeıiniń baspasóz qyzmeti.

Bul kúni saǵat 10.30-da «Ańyz áleminde» taqyrybynda balalarǵa arnalǵan naýryz erteńgiligi ótedi. Balalarǵa arnalǵan «Qazaqtyń ulttyq oıyndary: asyq atý» ekskýrsııa-sabaǵy júrgiziledi.

Sonymen birge, 21 naýryz kúni ulttyq kıim kıgender mýzeıge tegin kiredi.

«21 naýryz kúni mýzeıge ulttyq kıim kıgen kelýshiler tegin kiredi. Bir ǵana sharty: áleýmettik jelidegi (feısbýk - QR Ulttyq mýzeıi, ınstagram - Nationalmuseumkz, telegramm- QR Ulttyq mýzeıi) Ulttyq mýzeı paraqshalaryna tirkelip, #Ulttyqmýzeı heshtegin belgileýleri qajet», - delingen baspasóz habarlamasynda.

Aıta keteıik, Naýryz meıramyna oraı Astana qalasynda ótetin mádenı jáne sporttyq sharalardyń tolyq tizimin arnaıy materıaldan oqýǵa bolady.