Astanada úleskerlerdi zańsyz tartqan kompanııaǵa 1,5 mln teńge aıyppul salyndy

ASTANA. QazAqparat – Elorda sotynda úleskerlerdiń aqshasyn zańsyz tartqan JShS-ǵa qatysty is qaraldy jáne qurylys salýshyǵa aıyppul salyndy, dep habarlaıdy QazAqparat tilshisi.

Astana qalasynyń ákimshilik quqyqbuzýshylyqtar jónindegi mamandandyrylǵan aýdanaralyq soty JShS-ǵa qatysty úleskerlerdiń aqshasyn tartý tártibine jáne QR turǵyn úı zańnamasynda belgilengen turǵyn úı qurylysyna úlestik qatysý týraly talaptardy buzǵany úshin isti qarady (ÁQBtK 320-babynyń 1-bóligi).

Іs materıaldaryna sáıkes, JShS-nyń Kepildik berý qorynyń kepildigin almaǵany, ekinshi deńgeıli banktiń jobasyna qatyspaıtyny, úleskerlerdiń aqshasyn tartýdy bastaý úshin obektidegi turǵyn úı qańqasy turǵyzylmaǵany (qurylys jerasty parkınginde toqtaǵan), elordanyń jergilikti atqarýshy organynyń úleskerlerdiń aqshasyn tartýǵa ruqsaty alynbaǵany anyqtalǵan.

«QR turǵyn úı qurylysyna úlestik qatysý týraly» zańynyń 18-babynda ýákiletti kompanııa úleskerlerdiń aqshasyn tartýdy oblystyń, respýblıkalyq mańyzy bar qalanyń, astananyń, aýdannyń, oblystyq mańyzy bar qalanyń jergilikti atqarýshy organynyń ruqsaty negizinde júzege asyrady dep jazylǵan.

Sondaı-aq «QR turǵyn úı qurylysyna úlestik qatysý týraly» zańynyń 7-baby úlestik qatysýdy uıymdastyrý tásilderiniń tolyq tizbesin qamtıdy, mysaly:

1) Biryńǵaı operatordyń kepildigin alý;

2) Ekinshi deńgeıdegi banktiń jobasyna qatysý;

3) turǵyn úıdiń (ǵımarattyń) qańqasy turǵyzylǵannan keıin úleskerlerdiń aqshasyn tartý.

Sot qaýlysymen JShS-ǵa memlekettik bıýdjet kirisine 1 mln 35 myń teńge aıyppul túrinde jaza qoldanylyp, ákimshilik jaýapqa tartyldy.