Astanada úleskerler kútip júrgen 50 úıdiń 36-synyń problemasy sheshildi

ASTANA. QazAqparat - Astananyń jańa ákimi Jeńis Qasymbek úleskerlermen kezdesýdi jalǵastyryp jatyr, dep habarlaıdy QazAqparat.

Bul jaıynda ol Instagram paraqshasynda habardar etti.

«Búgin taǵy 5 kóppáterli turǵyn úı kesheniniń úleskerlerimen kezdestim. Olardyń qatarynda «Korgaljınskıı kvartal», «Komsomolskıı», «Shyǵys 4-1», «Turan-Syǵanaq» turǵyn úı keshenderiniń úleskerleri, sol sııaqty «Nash dom Anısa» turǵyn úı kooperatsııasynyń ókilderi bar. Atalǵan kóppáterli turǵyn úı keshenderindegi úleskerlerdiń jalpy sany - shamamen 1,5 myń adam» dep jazady shahar basshysy.

Onyń aıtýynsha, jyldar boıy turǵan úılerdiń jaı-kúıi ártúrli. Birinde jaqtaýy ǵana kóterilgen, al endi birinde irgetasy ǵana tur.

Máselen «Shyǵys 4-1» turǵyn úı kesheniniń keıbir bloktary tek irgetas kúıinde ǵana tur.

Kezdesý barysynda úleskerler túrli problemalardy qozǵady. Olardyń arasynda úıdiń qurylysy, ınjenerlik jeliler, sol sııaqty abattandyrý, qujattama jáne t.b. bar.

«Qurylys qarqynyn arttyrýdy tapsyrdym. Qurylysy uzaqqa sozylǵan 51 nysannyń ishinde osyǵan deıin 36 nysannyń problemacy sheshildi. Qalǵan 15 nysannyń 7-eýin aldaǵy aılarda aıaqtaımyz, 8 nysan (30-dan astam turǵyn úı kesheni) – 2023 jyly. Jergilikti oryndarda ótetin mundaı kezdesýlerdi barlyq úleskermen uıymdastyramyn. Sol sııaqty qalanyń eldi mekenderi men aýdandarynyń turǵyndarymen jeke kezdesemin» deıdi ákim.

Foto: Foto: instagram.com/jenis_qasymbek