Astanada Úkimettik emes uıymdarǵa syılyqaqy tabystaldy
Atalǵan is-shara QR Din isteri jáne azamattyq qoǵam mınıstrliginiń uıymdastyrylýymen ótkizilip otyr. Saltanatty sharaǵa QR Memleket hatshysy Gúlshara Ábdiqalyqova, QR Din isteri jáne azamattyq qoǵam mınıstri Nurlan Ermekbaev pen ÚEU, memlekettik organdardyń, sarapshylar qaýymdastyǵynyń ókilderi qatysty.
«Elbasy Nursultan Ábishuly Nazarbaev «Azamattyq qoǵam, onyń ishinde Úkimettik emes uıymdar - demokratııanyń ajyramas bóligi» dep aıtyp ótken bolatyn. Memleketimizdiń ósip-órkendeýi, qoǵamdyq sananyń jańǵyrýy azamattardyń belsendiligi arqyly júzege asyrylary anyq. Osy rette áleýmettik mańyzdy máselelerdi sheshýde eleýli úles qosqan otandastardy yntalandyrý úshin búgin tuńǵysh ret syılyqaqy tapsyrylmaq. «Rýhanı jańǵyrý» baǵdarlamasy aıasyndaǵy osynaý ıgi-sharamen barshańyzdy shyn júrekten quttyqtaımyn», - dedi Gúlshara Ábdiqalyqova.
Memleket hatshysynyń aıtýynsha, Qazaqstanda úshinshi sektor ótken ǵasyrdyń sekseninshi jyldary damı bastaǵan. Sol kezdegi belgili qoǵamdyq birlestikterdiń biri «Semeı-Nevada» bolyp tabylady.
«Táýelsizdik alǵaly beri qazaqstandyq Úkimettik emes uıymdar zor tájirıbe jınap, búgingi tańda elimizde 19680 ÚEU tirkelip otyr. Olardyń kóbi Astana men Almatyda, OQO, Qaraǵandy, Qyzylorda óńirlerinde belsendi jumys júrgizip jatyr. Úkimettik emes uıymdardyń quramynda 29 myńǵa jýyq adam jumys júrgizip jatyr. Sońǵy eki jylda memlekettik tapsyrys aıasynda Úkimettik emes uıymdar quny 26 mlrd teńgelik 14 myńǵa jýyq áleýmettik jobany júzege asyrǵan», - degen Gúlshara Ábdiqalyqova birqatar ÚEU basshylaryna saltanatty túrde syılyqaqyny tabys etti.
Arnaıy qurylǵan sarapshylar toby syılyqaqy alýǵa ótinish bildirýshilerden kelip túsken 216 ótinimdi qaraǵan. Baıqaý komıssııasynyń quramynda memlekettik organdar men halyqaralyq uıymdardyń ókilderi, belgili qoǵam qaıratkerleri men sarapshylar bolǵan.
«Ózderińiz biletindeı, Úkimettik emes uıymdar kóptegen áleýmettik mańyzy zor máselelerdi sheshýdiń memleket pen Úkimettiń senimdi seriktesi ári áriptesi bolyp tabylady. Jalpy aıtqanda, Úkimettik emes uıymdar Elbasynyń bizdiń aldymyzǵa qoıǵan maqsattarǵa qol jetkizýge, jalpy elimizdiń damýyna eleýli úlesin qosyp keledi. Al memleket óz tarapynan Úkimettik emes uıymdarǵa qoldaý kórsetýdiń túrli tásilderi men formalaryn izdestirip keledi. Osy qoldaýlardyń ishinde byltyrdan bastap berile bastaǵan memlekettik-áleýmettik tapsyrys, granttyq qarjylandyrý jáne osynaý bıyldan bastap berilip jatqan syılyqaqy. Onyń bári Elbasy belgilegen Azamattyq qoǵamǵa kórsetken qoldaýy men jalpy demokratııalyq saıasattyń belgileri. Osy baıqaýǵa ÚEU qatysyp, onyń ishinde tek 59-y ǵana iriktelip, 15 baǵyt boıynsha syılyqaqyǵa ıe bolyp otyr. Jalpy, barshańyzǵa tabys tileı otyryp, ortaq maqsatqa jetý úshin úles qosýlaryńyzdy suraımyz», - dep quttyqtady mınıstr Nurlan Ermekbaev.
Baıqaý qorytyndysyna sáıkes, 15 nomınatsııa boıynsha 59 Úkimettik emes uıym syılyqaqy ıegeri atandy. Atap aıtqanda, «Qazaqstan KVN Odaǵy» respýblıkalyq jastar qoǵamdyq birlestigi, «Ardager», «Jenskıı lých» birlestikteri, «Pravo» qoǵamdyq qory, «QR Prezıdentiniń «Bolashaq» halyqaralyq stıpendııasy stıpendıattarynyń qaýymdastyǵy» sekildi birlestikter syılyqaqyǵa ıe boldy. «Shyraq» uıymy «Azamattardyń densaýlyǵyn saqtaý, salaýatty ómir saltyn nasıhattaý» nomınatsııasy boıynsha jeńimpaz atandy. Al «Zýbr» áleýmettik korporatıvtik qory «Qoǵamdyq kelisim men ulttyq birlikti nyǵaıtý» komınatsııasyn jeńip aldy. Árbir syılyqaqynyń mólsheri 4,5 mln teńgeni quraıdy.