Astanada túrikmen aqyny Maqtymquly Pyraǵynyń eskertkishi ashyldy
Máýlen Áshimbaev meımandarǵa iltıpat bildirip, Qazaqstan men Túrikmenstan arasyndaǵy tereńnen tamyr tartatyn baýyrlastyq jáne dostyq qarym-qatynastyń mańyzy zor ekenin aıtty. Sondaı-aq ol búgingi tıimdi memleketaralyq yntymaqtastyq eki eldiń basshylary Qasym-Jomart Toqaev pen Serdar Berdymuhammedovtiń ózara qurmetke negizdelgen baılanysynyń jáne Halk Maslahatynyń Tóraǵasy Gýrbangýly Berdimuhamedovtiń belsendiliginiń nátıjesi ekenine nazar aýdardy.
«Qazaqstan astanasynda Maqtymquly eskertkishiniń ashylýy halyqtarymyzdy baılanystyratyn rýhanı sabaqtastyqtyń jarqyn kórinisi ekeni anyq. Aldaǵy ýaqytta Ashhabadta qazaqtyń uly oıshyly jáne bas aqyny Abaıǵa arnalǵan eskertkish ornatylady. Bul eki oqıǵa sımvolıkalyq mánge ıe», – dedi Máýlen Áshimbaev.
Sonymen qatar Senat Spıkeri Abaı men Maqtymqulynyń fılosofııasy, poezııasy, aıtar oıy men ósıeti úndes ekenin tilge tıek etti. Sondaı-aq ol Maqtymqulynyń shyǵarmashylyǵy túrikmen halqynyń danalyǵy men parasatyna taban tireıtinin, aqynnyń murasy búkil adamzatqa ortaq ıgilik ekenin atap ótti. Máýlen Áshimbaev Astanada Maqtymquly eskertkishiniń ashylýy Qazaqstan men Túrikmenstan halyqtarynyń dostyq baılanysyn odan ári nyǵaıtýǵa tyń serpin beretinin de aıtty.
«Fılosoftyń ǵajaıyp týyndylary men ósıetteri 300 jyldan beri týǵan jurtynyń asqaq rýhymen jáne jasampaz qýatymen birge jasap keledi. Maqtymqulynyń shyǵarmalary túrikmenniń tól qundylyqtarynan nár alady. Shyn máninde, aqynnyń murasy – adamzattyń altyn qoryna qosylǵan qundy eńbek jáne Ortalyq Azııa halyqtarynyń ortaq qazynasy», – dedi Qazaqstan Parlamenti Senatynyń Tóraǵasy.
Sondaı-aq saltanatty rásimde aqynnyń 300 jyldyǵy Qazaqstanda da keń kólemde atalyp ótip jatqany aıtyldy. Mereıtoı aıasynda ǵylymı konferentsııalar uıymdastyryldy. Odan bólek, Qazaqstannyń Mádenıet jáne aqparat mınıstrligi Maqtymquly atyndaǵy Halyqaralyq syılyq taǵaıyndaý týraly bastama kóterdi.
Astanada atalǵan eskertkishtiń ashylýy Túrikmenstannyń Qazaqstandaǵy mádenıet kúnderi men Qazaqstannyń Túrikmenstandaǵy mádenıet kúnderi aıasynda ótkizilip otyr. Mundaı qadam ekijaqty qarym-qatynastardy odan ári nyǵaıtýǵa jáne qazaq-túrikmen halyqtarynyń rýhanı baılanysyn arttyrýǵa oń áserin tıgizetini sózsiz. Aıta keteıik, 2024 jyl túrki áleminde Maqtymquly Pyraǵy jyly bolyp jarııalandy. Al, aqynnyń mereıtoıy ıÝNESKO-nyń ataýly datalarynyń tizimine qosyldy.