Astanada túrkitanýshy ǵalym Mandokıdiń jınaǵy tanystyryldy

ASTANA. QazAqparat - Astanada Halyqaralyq Túrki akademııasy (TWESCO) Vengrııa ǵylym akademııasynyń qoldaýymen shyǵarǵan kórnekti túrkitanýshy ǵalym Ishtvan Qońyr Mandokıdyń «New comers from the East. Hungarians and Kipchak-Turks in Europe» (Shyǵystan qonystanýshylar. Majarlar men Eýropadaǵy qypshaq-túrkiler) atty ǵylymı jınaǵynyń tanystyrylymy ótti.

TWESCO saıtynyń habarlaýynsha, QR Ulttyq akademııalyq kitaphanasynda ótken shara  majar eli men túrki halyqtarynyń mádenı qarym-qatynasynyń damýyna zor úles qosqan I.Q. Mandokıdyń ómirden ótkenine 25 jyl tolýyna oraılastyryldy.

Akademııa basshysy Darhan Qydyráliniń moderatorlyǵymen dóńgelek ústel formatynda ótken basqosýǵa Vengrııa elshiliginiń dıplomattary, atalǵan jınaqty ázirlep, daıyndaǵan vengrııalyq professor Adam Molnar,  majar túrkology, Mandokıdiń shákirti Davıd Shomfaı Qara men túrkolog ǵalymdar jáne zııaly qaýym ókilderi qatysty. 

Óz sózinde D.Qydyráli oqyrman jurtshylyqqa tanystyrylǵan eńbektiń Túrki akademııasynyń arnaıy jobasy aıasynda ázirlengenin, sonymen birge Vengrııanyń ǵylymı ortasy men TWESCO arasynda qalyptasqan yntymaqtastyq nátıjeleri jóninde áńgimeledi. 

Sonymen qatar, is-shara aıasynda I.Q.Mandokıdiń ómiri men qyzmetine arnalǵan «Kypshakskıı pervoprohodets» («Jol salýshy qypshaq») atty derekti fılm usynyldy. 

Aıta ketý kerek, búgin qazaqstandyq oqyrmanǵa tanystyrylǵan ǵylymı jınaqtyń tusaýkeserin akademııa alǵash 2015 jyly Vengrııa astanasy Býdapesht qalasynda ótkizgen bolatyn. Budan bólek, áıgili túrkitanýshy I.Q. Mandokıdiń 16 myń kitap pen qundy qoljazbalary búginde Halyqaralyq Túrki akademııasynyń kitaphanasynda saqtaýly.