Astanada túrki mýzykasy festıvali ótedi

ASTANA. QazAqparat - Tegi bir, tili uqsas, tilegi ortaq túrki elderiniń dástúrli mýzykasyna arnalǵan «Astana-Arqaý» festıvali elorda tórinde osymen on birinshi márte ótkeli otyr. Festıval shildeniń 4-i men 5-i kúnderi, saǵat 19.00-de «Astana Opera» memlekettik teatrynyń kameralyq zalynda bastalady, dep habarlaıdy QazAqparat.

Túrki halyqtarynyń aıtýly mýzykanttary qatysatyn  «Astana-Arqaý» festıvali - baýyrlas elderdiń  mýzykalyq murasyn nasıhattaýǵa arnalǵan mádenı joba. Astanalyq kórermen týysqan halyqtardyń mýzykalyq mádenıetimen jaqynyraq tanysyp, sırek kezdesetin aspaptardyń únin estýge múmkindik alady. 11 jylda festıvalǵa túrki halyqtarynyń  500-den astam  aıtýly mýzykanttary men belgili ǵalymdary qatysty. Aıta keteıik, mundaı iri kólemdegi festıval Astanada ǵana ótkizilip keledi.

Bıyl festıval qonaqtarynyń arasynda Qyrǵyzstannyń halyq ártisi jáne Qazaqstannyń eńbek sińirgen ártisi Salamat Sadyqova, QR eńbek sińirgen ártisteri Shámil Ábiltaı, Ramazan Stamǵazıev, QR eńbek sińirgen qaıratkeri Aıgúl Qosanova, Erbolat Shaldybekov, Sársenǵalı Júzbaev, Tileýles Qurmanǵalıev, Aqmaral Noǵaıbaeva, Baqytjan Dúısenǵazıev jáne taǵy basqalar bar.

«Astana-Arqaý» festıvali túrki halyqtarynyń san qyrly  etnomýzykasynyń erekshelikterin ashýdy, sondaı-aq qatysýshylar men qonaqtarǵa Qazaqstan Respýblıkasynyń jańa tarıhyn tanystyrýdy kózdeıdi.