Astanada Túrki keńesiniń Týrızm mınıstrleri bas qosady

ASTANA. QazAqparat - Túrki keńesi Týrızm mınıstrleriniń tórtinshi kezdesýi 8 tamyzda Astana qalasynda «Hılton Ekspo» qonaq úıinde bastalady, dep habarlaıdy QazAqparat «Egemen Qazaqstan» gazetine silteme jasap.

Mınıstrler kezdesýine, Túrki keńesi týrızm mınıstrleri (Ázerbaıjan, Qazaqstan, Qyrǵyzstan, Túrkııa), Túrki keńesi múshe memleketteriniń tıisti mınıstrlikteriniń joǵary laýazymdy tulǵalary jáne ulttyq týroperatorlar qatysady.

Mınıstrler kezdesýinen bir kún buryn Túrki keńesi týrızm jónindegi jumys tobynyń 13-shi otyrysy ótedi. Jumys tobynyń otyrysy 2018 jyly 7 tamyzda Astanada bastalady. Atalǵan jıynǵa Túrki keńesi múshe memleketteriniń tıisti mınıstrlikteriniń ókilderi jáne jumys tobynyń múshe týroperatorlary qatysady. Kezdesýdiń moderatory qyzmetin Túrki keńesi Bas hatshy orynbasary Ómer Kodjaman atqarady.

Kezdesý barysynda, ásirese Ózbekstan, Túrkimenstan jáne Qytaımen týrızm salasynda qarym-qatynastardy damytý, túrkitildes memleketter arasynda vızalyq rejımderdi jeńildetý, BUU-nyń Búkilálemdik týrıstik uıymymen baılanysyn nyǵaıtý, sondaı-aq, túrki memleketteriniń Uly Jibek jolyndaǵy baı tarıhı murasyn beıneleıtin jáne qazirgi tańda alǵashqy týrısterdi qabyldaýǵa daıyn «Zamanaýı Jibek joly» birlesken týrıstik jobasyn jarnamalaý men habarlańdyrý máseleleri jáne týrızm salasyndaǵy basqa da taqyryptar talqylanady.