Astanada tuńǵysh ret toqý festıvali ótedi
Festıval bizben jáne ilgekpen toqýǵa áýes jandardyń basyn qospaq, sharaǵa atalmysh qolónerge jańadan qosylǵandar da, toqýmen kásibı aınalysatyndar da qatysady. Jańadan kelgender úshin toqý, jip ıirý jáne kıiz basýdan tegin sheberlik synyptary uıymdastyrylady.
Alǵashqy «Ioga mozga XXI veka» toqý festıvaliniń ereksheligi - oǵan múmkindigi shekteýli jáne psıhologııalyq kemshilikteri bar tulǵalar da qatysa alady. Olar densaýlyǵynyń nashar bolýyna baılanysty toqýdy úırenip, festıvaldi uıymdastyrýshy Rahıma Muqyshevanyń arqasynda aqsha tabý múmkindigine ıe boldy. Búgingi tańda onyń Bergen sheberhanasynda 12 adam jumys isteıdi, onyń ishinde jeteýi halyqtyń áleýmettik osal toptaryna jatady.
«Men adamdarǵa toqýdy úıretemin. Bul da ózindik bir terapııa, ol bireýlerge zeıinin shoǵyrlaýǵa jáne qıyndyqtar men máselelerdi jeńýge kómektesedi, al basqalary úshin toqý - aqsha tabýdyń jalǵyz joly. Astana qalasynyń ákimdiginiń qoldaýynyń arqasynda toqý festıvalin ótkizip otyrmyz, munda nıet bildirgen jandardyń barlyǵy, jasyna, densaýlyǵyna jáne kásibine qaramastan, toqýdy úırenedi nemese jetildiredi», - dedi Rahıma Muqysheva.
Budan basqa, festıvalge qatysýshylar úshin ıoga men samba-jumping sabaqtary, kitapqa qumar jáne selfı jasaǵandy unatatyndarǵa arnalǵan gamaktar aımaǵy, túrli konkýrstar men kontserttik baǵdarlama uıymdastyrylady.
«Ioga mozga XXI veka» festıvaline qatysýshylar toqýdy úırenip qana qoımaı, qaıyrymdylyq jasaıdy. «28 petel» («28 ilmek») klýbynyń múshelerimen birge merziminen buryn dúnıege kelgen sábılerge kıim toqýǵa úles qosady.
Úsh kún boıy saǵat 13:00-den 20:00-ge deıin festıval aýmaǵynda áleýmettik jumystar kórmesi ótedi, sondaı-aq, týyndylardy satyp alýǵa bolady. Atap aıtqanda, Bergen sheberhanasynyń jumyskerleri men basqa da sheberler óz qoldarymen toqyǵan kardıgandar, sómkeler, moher koftalar satylady.