Astanada Tuńǵysh Prezıdent kúnine oraı merekelik kontsert ótip jatyr
Merekelik sharada Astana qalasynyń ákimi Baqyt Sultanov qazaqstandyqtar men elordalyqtardy QR Tuńǵysh Prezıdenti kúnimen quttyqtady. Shahar basshysy Elbasy kúni - eń aldymen halqymyzdy eldik pen birlikke, yntymaq pen yrys-berekege jumyldyratyn halyqtyq mereke ekenin aıtyp ótti.
«Búginde Elbasymyzdyń strategııalyq kóshbasshylyǵymen Qazaqstan qarqyndy áleýmettik-ekonomıkalyq damý jolyna túsip, halyqaralyq arenada bedeldi memleketke aınaldy. Munyń barlyǵy Memleket basshysynyń sarabdal saıasaty men saıası kóregendiginiń arqasynda múmkin bolyp otyr. Memleketimizdiń Tuńǵysh Prezıdenti - jańa táýelsiz memlekettiń negizin qalap, onyń áleýetin asyryp, baıandy bolashaqqa bastap kele jatqan tarıhı tulǵa. Osynaý saltanatty sharanyń Tuńǵysh Prezıdent kúni aıasynda ótkizilýi kezdeısoq emes. Óıtkeni, Astana - Elbasymyzdyń tól jobasy. Astana - elimizdiń júregi, táýelsizdiktiń tiregi», -dedi B.Sultanov.
Sonymen qatar, qala basshysy Elorda Memleket basshysynyń barlyq mańyzdy bastamalary: Bes ınstıtýtsıonaldyq reforma, «Rýhanı jańǵyrý: Bolashaqqa baǵdar» baǵdarlamalyq maqalasy jáne «Uly dalanyń jeti qyry» maqalasynda aıtylǵan barlyq ustanymdardy júzege asyrýda aıryqsha belsendi bolýy qajettigin, atalǵan baǵdarlamalardyń barlyǵy buǵan deıin qabyldanǵan strategııalyq qujattardyń jalǵasy ekenin basa aıtty.
Kontsertke elimizge tanymal óner juldyzdary Qaırat Nurtas, Altynaı Jorabaeva, Qaraqat Ábildına, Búrkit pen Aısha, Tóreǵalı Tóreáli, Mádına Sádýaqasova jáne taǵy basqa ártister óner kórsetip jatyr.
«Eń aldymen elimiz ben Elbasymyzdyń amandyǵyn tileımin. Sebebi, osyndaı tynysh zaman, beıbit elde ómir súrýimiz memleket basshysynyń el basqara bilý qasıetteriniń arqasynda. Sonymen qatar, prezıdent Nursultan Ábishulynyń ónerge degen erekshe qurmeti úshin alǵys aıtqym keledi. Ásirese ulttyq ónerge aıryqsha qarap, mýzykany jany súıip tyńdaıtynyn bárimiz bilemiz», - dedi ánshi Qaraqat Ábildına.