Astanada «TMD arýy» baıqaýy ótedi
Bastaýyn 1996 jyldan alatyn TMD arýy ataǵy úshin 16 elden 25-ten astam sulýlar baǵyn synaıdy. Baıqaýda óz elin tanystyratyn arýlar buǵan deıin birneshe satydan turatyn irikteý kezeńderinen ótti.
Saıysta arýlar óz elderiniń ulttyq kıimi men keshki sándi kıimde sán kórsetedi.
«Biz úshin bundaı keń kólemdegi sharany ótkizý - úlken jaýapkershilik. Maqsat - TMD elderi arasyndaǵy dostyq qarym-qatynasty nyǵaıtý. Qazaqstannyń atynan baıqaýda birneshe arý baǵyn synaıdy, onyń ekeýi belgili, úshinshi arýǵa irikteý 1 shildege deıin Instagram áleýmettik jelisi arqyly júrýde», - deıdi «Velada Group» halyqaralyq sulýlyq agenttiginiń bas dırektory, Qazaqstanda TMD arýy-2018 baıqaýynyń uıymdastyrýshysy Zarına Kóptileýova.
Odan bólek, baıqaýǵa qatysýshy TMD arýlary Astanaǵa saıystan 10 kún buryn kelip, qazaq eliniń qonaqjaılyǵymen jáne Astananyń kórikti jerlerimen tanysyp, sonymen qatar qaıyrymdylyq sharalaryna qatysady.
Shara «Rýhanı jańǵyrý» baǵdarlamasy aıasynda, Astananyń 20 jyldyq mereıtoıyna oraı uıymdastyrylýda. Sulýlyq baıqaýyna álemdik deńgeıdegi estrada juldyzdary men sán áleminiń kórnekti ókilderi, dızaınerler qatysady dep kútilýde.