Astanada til normasyn buzǵan myńǵa jýyq jarnama alynyp tastaldy
«Bizdiń basqarma janynan qurylǵan jumysshy tobynyń ókilderi jyl basynan beri 150-ge jýyq kósheni aralap, til normalaryna qaıshy keletin jáne ýákiletti organmen kelisilmegen 1 000-ǵa jýyq jarnamany alyp tastady. Qazir «Jarnamadaǵy til tazalyǵy - barshaǵa ortaq is» jalpyqalalyq aktsııasy aıasynda bul jumys jalǵasyp jatyr», - dedi Sáken Esirkep.
Onyń aıtýynsha atalǵan sharanyń negizgi maqsaty - zańsyz jarnamamen kúres jáne olardaǵy til tazalyǵyn saqtaý, sondaı-aq ol jarnamalardaǵy qatelik kóbinese qazaq tiline qatysty ekenin de aıtyp ótti.
«Jospar boıynsha qalada qaı jerde problema kóp sol jerge baryp jatyrmyz. Negizi zań boıynsha jarnama eskızi aldyn ala bizben kelisilýi tıis. Eger kelispese demek jarnama zańsyz degen sóz. Taǵy bir aıta ketetin jaıt, bul tekserý jumysy emes monıtorıng jasaý jáne aktsııa jyl sońyna deıin jalǵasady. Búginde bul sharaǵa Astana stýdentterin de tartýdamyz, jalpy elorda turǵyndaryn belsene qatysýǵa shaqyramyz», - dedi ol.
Sóz sońynda S.Esirkep jarnamalardaǵy qatelikti naqty atap kórsetip, tipti resmı hat jazsa da qımyldaǵysy kelmeıtin keıbir mekemelerdiń baryn aıta kele, degenmen belsendi qatysýshy uıymdardyń kóptigin tilge tıek etti, sonyń ishinde til normasyn saqtaý sharasyna Astana qalasynyń «Baıqońyr» jáne «Saryarqa» aýdandary ákimdikteriniń zańsyz ornatylǵan jarnamalardan tazartý máselesinde biraz sharýany jasap jatqanyn atap ótti.
Aıta keteıik, qala boıynsha jarnamalardan qate kezdestirgen jaǵdaıda onyń ornalasqan jerin, kúnin, tıisti fotosýretti tirkeı otyryp a.imangali@astana.kz elektrondy mekenjaıyna nemese Til basqarmasynyń Feısbýktegi akkaýntyna habarlama jazyp jiberýge bolady. Baılanys telefondary 8(7172)556729, 556702, 87785237907.