Astanada Til festıvali aıasynda halyqaralyq «Jaıdarman» oıyny ótedi

ASTANA. QazAqparat - 25 tamyz kúni saǵat keshki 18:30-da elordadaǵy «Astana» kontsert zalynda halyqaralyq «Jaıdarman» oıyny ótkiziledi. Saıysqa Qazaqstan, Tatarstan, Bashqurtstan, Qyrǵyzstan elderinen jalpy jıyny 10  komanda qatysady dep kútilip otyr, dep habarlaıdy «QazAqparat» HAA tilshisi.

«Jaıdarman» oıynyn QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń memlekettik tapsyrmasy negizinde Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy men «Qazaqstan KVN Odaǵy» respýblıkalyq jastar qoǵamdyq birlestigi birlesip ótkizbek.

««Jaıdarman»  oıyndary  jastardyń shyǵarmashylyq alańy ǵana emes, qoǵamdaǵy túıtkildi máselelerdi ázilmen astarlaı jetkizetin óner dodasyna aınalǵan jáne qazaqstandyqtar súıip kóretin televızııalyq joba retinde qalyptasty. «Jaıdarman» alańynyń mektep jasyndaǵy jetkinshektermen qatar stýdentterdi, jumysshy jastardy qosa alǵanda 200 myńǵa jýyq talanttylardy toptastyrǵany kóńil qýantady», - deıdi uıymdastyrýshylar.

Tyń formatta ótkiziletin jarysqa Qazaqstan, Tatarstan, Bashqurtstan, Qyrǵyzstan elderinen  10  komanda qatysady dep kútilýde. Jobany «Qazaqstan» ulttyq arnasy efırinen kórsetý josparlanǵan.