Astanada Táýelsizdikke arnalǵan «Azattyqtyń tańynan damýdyń dańǵyl jolyna» atty oralmandar forýmy ótedi
21:37, 13 Jeltoqsan 2013
ASTANA. 13 jeltoqsan. QazAqparat - Erteń, ıaǵnı 14 jeltoqsan kúni Astana qalasy Іshki saıasat basqarmasynyń qoldaýymen «Kóship-qonýshylardyń aqparattyq jáne analar men balalardy qoldaý «Meıirim-Demeý» ortalyǵy» qoǵamdyq birlestiginiń uıymdastyrýymen «Azattyqtyń tańynan damýdyń dańǵyl jolyna» atty Astana qalalyq oralmandar forýmyn ótkizedi. Bul týraly birlestiktiń baspasóz ortalyǵy habarlap otyr.
Uıymdastyrýshylardyń aıtýynsha, forýmnyń maqsaty - Táýelsizdiktiń aıtýly jemisteriniń biri - alys-jaqyn shetelden kelgen bir mıllıonǵa jýyq qandastarymyzdyń oralýy bolsa, solardyń ishindegi óner, sport, medıtsına salasynda qyzmet etetin adamdardyń, ǵalymdar men kásipkerlikpen aınalysatyn azamattardyń elimizdiń ekonomıkasy men mádenıetine, rýhanııatyna qosyp jatqan úlesterin nasıhattaý, qandastarymyzdyń qazaq eline degen súıispenshligin jetkizý.
Shara L.N Gýmılev atyndaǵy EUÝ-niń áleýmettik ǵylymdar fakýltetiniń májilis zalynda 16:00-de bastalady.