Astanada syıymdylyǵy shaǵyn úı ashyldy

ASTANA. QazAqparat – QR Áleýmettik kodeksin iske asyrý aıasynda Qazaqstan óńirlerinde jeke sektordy tarta otyryp, arnaýly áleýmettik qyzmetter kórsetý úshin syıymdylyǵy shaǵyn úıler qurý jónindegi pılottyq joba bastaldy, dep habarlaıdy QazAqparat.

Eńbek jáne halyqty áleýmettik qorǵaý mınıstrliginen málim etkendeı, jan basyna shaqqandaǵy qarjylandyrýdy engizý arqyly jeke sektordy tarta otyryp, arnaýly áleýmettik qyzmetter kórsetýdiń memlekettik ortalyqtaryn kezeń-kezeńimen monopolııadan aryltý josparlanýda. Múgedektigi bar adamdarǵa arnalǵan syıymdylyǵy shaǵyn úıler aýyldyq jerlerde de salynatyn bolady.

Pılottyq jobaǵa elimizdiń 7 óńiri qatyspaq, olar: Aqmola, Batys Qazaqstan, Qaraǵandy, Túrkistan oblystary jáne Astana, Almaty, Shymkent qalalary.

Buǵan deıin habarlanǵandaı, múgedektigi bar balalarǵa arnalǵan alǵashqy shaǵyn úı 2023 jyldyń 4 shildesinde Qaraǵandyda ashyldy.

Bıyl 29 tamyzda Kókshetaý jáne Shymkent qalalarynda, al 1 qyrkúıekte Astana qalasynda osyndaı úıler paıdalanýǵa berildi.

Múgedektigi bar balalarǵa arnalǵan syıymdylyǵy shaǵyn úılerde arnaýly áleýmettik qyzmetterdiń kepildik berilgen kólemi qoljetimdi. Olar áleýmettik-turmystyq, áleýmettik-medıtsınalyq, áleýmettik-psıhologııalyq, áleýmettik-pedagogıkalyq, áleýmettik-eńbek, áleýmettik-mádenı, áleýmettik-quqyqtyq, áleýmettik-ekonomıkalyq. Ortalyqtarda emdik dene shynyqtyrý, massaj, defektolog, logoped, psıholog kabınetteri jáne balalardy damytýǵa arnalǵan túrli kabınetter bar. Búginde syıymdylyǵy shaǵyn úılerde 80-ge jýyq bala qyzmet alyp otyr. Syıymdylyǵy shaǵyn úıler jaǵdaıynda qyzmet kórsetý statsıonarlyq jáne jartylaı statsıonarlyq uıymdardyń qoldanystaǵy jelisine balama bolyp tabylady jáne balanyń otbasymen birge bolýyna baǵyttalǵan. Bul bastama múgedektigi bar balalardyń ata-analaryna jumys jasaýyna jáne otbasynyń ál-aýqatyn arttyrýǵa múmkindik beredi

, - delingen mınıstrlik málimetinde.