Astanada sý tarıfin ózgertý talqylanyp jatyr
«Jyl saıyn abonentter, ıaǵnı páter sany kóbeıip keledi. Qazirgi ýaqytta 470 myń abonent bolsa, jaqyn aralyqta bul kórsetkish 500 myńǵa jetedi. Osyǵan baılanysty uıym shtatyn úlkeıtý qarastyrylýda. Sý tarıfin kóterý káriz jelilerin jóndeý men qaıta jańǵyrtýǵa, jabdyqty jańartýǵa qosymsha ınvestıtsııalar salýǵa, strategııalyq taýarlardyń qunyn arttyrýǵa jáne kásiporyn qyzmetkerleriniń jalaqysyn arttyrýǵa qajet», - dedi «Astana sý arnasy» MKK bas dırektory Tabıǵat Zeınýlqabden Almaty aýdanynyń ákimdiginde ótken jarııa tyńdaýda.
«Astana sý arnasynyń» habarlaýynsha, qazirgi tarıfter 2023 jyldyń maýsym aıynda bekitilgen.
Jańa jyldan bastap, aýyz sýǵa tarıfti halyq úshin 58 teńgeden 66 teńgege, energııa óndiretin kásiporyndar úshin – 175 teńgeden 192 teńgege, bıýdjettik uıymdar men zańdy tulǵalar úshin – 242 teńgeden 266 teńgege deıin arttyrý usynylyp otyr.
Al sý burý men aǵyn sýdy tazartý tarıfin halyq úshin – 45 teńgeden 53 teńgege deıin, energııa óndiretin kásiporyndar úshin – 195 teńgeden 219 teńgege, bıýdjettik uıymdar men zańdy tulǵalar úshin – 250 teńgeden 279 teńgege deıin kóterý usynylǵan.
Tehnıkalyq sý berý tarıfin 40 teńgeden 43 teńgege deıin arttyrý kózdelgen.
«Kez kelgen tarıftiń ósýin tutynýshylar jáne ásirese halyq aýyr qabyldaıdy. Bul rette biz kóktemnen bastap tarıfterdi belsendi kótere bastadyq. Bıyl Astanada sý máselesi oryn aldy. Bul bir kúndik másele emes, osy kúnge deıin qordalanyp jınaldy. «Astana sý arnasynyń» jaǵdaıy da qanshalyqty qıyn ekenin kórdik. Astana tarıf boıynsha 19-20 óńir arasynda 12-13 orynda tur, ıaǵnı tarıf tómen. «Astana sý arnasyna» qoldaý qajet. Tarıfterdi kóterýdi de qoldaý kerek», - dedi "Básekelestik saıasatty damytý jáne qorǵaý ortalyǵy" AQ vıtse-prezıdenti Marat Mustafın.
Jarııa tyńdaý qorytyndysy boıynsha aıtylǵan eskertýler men usynystar eskerilip, ótinimder muqııat taldanǵan soń departament túpkilikti sheshim qabyldaıdy.