Astanada sý tapshylyǵyn sheshý úshin Bishkektegideı monsha men kólik jýatyn oryndardy jabý kerek pe

ASTANA. QazAqparat – Premer-Mınıstrdiń orynbasary Altaı Kólginov Úkimet kýlýarynda Astanadaǵy sý tapshylyǵyn sheshý úshin Bishkektiń tájirıbesin qoldaný qanshalyqty oryndy ekenin aıtty, dep habarlaıdy QazAqparat tilshisi.

«Astanadaǵy sý tapshylyǵy máselesin sheshý úshin Bishkektiń úlgisi boıynsha monshalar men basseınderdi, kólik jýatyn oryndardy jabý kerek pe?» dep surady BAQ ókili spıkerden.

«Qazir olaı isteýdiń qajeti joq. Óıtkeni sý soryp, súzetin stansa iske qosylady. Biraq keleshekte problema bolady. Ol úshin sý tartatyn arna salý kerek», - dedi vıtse-premer.

Eske sala keteıik, biz buǵan deıin Qyrǵyzstan astanasynda monsha, kólik jýý oryndary men basseınder ýaqytsha jabylyp jatqanyn jazǵan bolatynbyz.

Merııa baspasóz qyzmetiniń málimetinshe, aýyz sý tapshylyǵyna baılanysty mer orynbasary Jyrgalbek Shamyralıev tıisti qyzmettermen birge reıd júrgizgen.

Tekserý qorytyndysy boıynsha úlken kólemde sý jumsaıtyn jeke monshalar, kólik jýý oryndary men basseınder ýaqytsha jabylǵan.