Astanada stýdentterge arnap 5 jataqhana salynady

ASTANA. QazAqparat - Astanada bıyl 1900 orynǵa arnalǵan 5 stýdenttik jataqhana salynyp, qoldanýǵa beriledi. Al 2025 jylǵa deıin jeke ınvestorlar men joǵary oqý oryndarynyń menshikti qarajaty esebinen 11 myńǵa jýyq oryndy paıdalanýǵa berý josparda bar, dep habarlaıdy QazAqparat elorda ákimdiginiń resmı saıtyna silteme jasap.

Resmı saıttaǵy málimetterge qaraǵanda, Astanada stýdenttik jataqhanalar salý boıynsha jobalyq keńse ashyldy.

Front-ofıstiń negizgi mindeti - jataqhanalar salý jónindegi memlekettik baǵdarlamany iske asyrý úshin qolaıly jaǵdaılar jasaý jáne stýdentterdi turǵyn úımen qamtamasyz etý, sol sııaqty JOO-lar men áleýetti ınvestorlarǵa zańgerlik, konsýltatsııalyq jáne saraptamalyq qoldaý kórsetý.

Jobalyq keńseniń ashylýynda Astana ákimi Jeńis Qasymbek pen QR Ǵylym jáne joǵary bilim mınıstri Saıasat Nurbek quttyqtaý sóz sóıledi.

«Elordaǵa oqýǵa keletin stýdentter sany jyl saıyn artyp keledi. Qalada 15 joǵary oqý orny bar, onda 67 myńǵa jýyq stýdent oqıdy. Olardyń bir bóligi bul qaladan emes. Jaýapty mınıstrlikpen birlesip ınfraqurylymdy qurý boıynsha jumys júrgizemiz. Jataqhanalarda kezeń-kezeńimen oryn daıyndaımyz. Bul jumys ınvestorlardy da, joǵary oqý oryndaryn da jumyldyra otyryp júrgiziledi. Biz óz tarapymyzdan jer ýchaskeleri men ákimshilik máseleler boıynsha kómek kórsetemiz», - dedi Astana ákimi Jeńis Qasymbek.

Bıyl «Qarjy ortalyǵy» AQ QR Ǵylym jáne joǵary bilim mınıstrligi ázirlegen jańa tetik boıynsha sýbsıdııalaýǵa jáne basqa da máselelerde kómek kórsetedi. Bul tetik árbir tósek-oryn úshin jańa jataqhanalar salý kezinde sýbsıdııalardy kózdeıdi.

Investorlar, QR Ǵylym jáne joǵary bilim mınıstrligi, Astana ákimdigi, «Qarjy ortalyǵy» AQ jáne birqatar JOO arasynda stýdenttik jataqhanalar salý boıynsha ary qaraı da jemisti yntymaqtastyq ornatý týraly memorandýmdar jasaldy.