Astanada sporttyq baǵdarlamalaýdan álem chempıonaty ótýi múmkin

ASTANA. QazAqparat – Otandyq IT salasy qarqyndy damyp keledi. Sala mamandarynyń jalaqysy ósip keledi, bir jyl ishinde ortasha jalaqy shamamen 100 myń teńgege kóterilgen. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

«Búginde elimizde 16 myńnan astam ІT kompanııa bar, atalǵan salada 180 myńnan astam maman jumys isteıdi. Jalaqy kólemi de qarqyndy ósip jatyr, bir jyl ishinde ortasha jalaqy shamamen 100 myń teńgege kóterildi. Oń dınamıka ári qaraı ósý múmkindigin kórsetip otyr. Bul óz kezeginde ІT salasyn eń tartymdy baǵyttardyń birine aınaldyrdy. Sondaı-aq, sporttyq baǵdarlamalaýdy nasıhattaý jáne damytý IT ındýstrııasyn damytýǵa úlken yqpalyn tıgizedi. Osy maqsatta Astana qalasynda sporttyq baǵdarlamalaý boıynsha álem chempıonatyn ótkizýge ótinim berildi», - dedi Baǵdar Mýsın Úkimet otyrysynda.

Mınıstrdiń málimdeýinshe, IT eksport bes ese ósip, 334 mln AQSh dollarǵa jetti. Onyń ishinde 153 mln AQSh dollary Astana Hub-tyń qatysýymen iske asty.

«Bul bizdiń tsıfrlyq ónimderimizdiń halyqaralyq arenada básekeli bolýynyń kórsetkishi. Astana Hub — Ortalyq Azııa óńirindegi Google for Startups-tiń jalǵyz seriktesi. Qazaqstan aımaqtyq iri IT oıynshysyna aınalyp keledi. 15 qyrkúıekte Ortalyq Azııa men Túrki memleketteriniń uıymyna múshe elderdiń startaptaryn qoldaýǵa jáne ilgeriletýge baǵyttalǵan Silkroad Innovation Hub ókildigi ashylady. Odan bólek IT mamandardy tartý maqsatynda Digital Nomad visa jobasy iske asyrylady», - deıdi ol.