Astanada sport salasynyń úzdikteri marapattaldy
Sport kúnine arnalǵan saltanatty shara tanymal mánerlep syrǵanaýshy Denıs Tendi eske alýdan bastaldy. "Jaqynda biz Denıs Tennen aıyrylyp qaldyq. Ol óz eliniń ǵana emes, álemdik sporttyń jaryq juldyzy edi. Ony bárimiz anyq baıqadyq. Álemniń túkpir-túkpirinen qanshama sportshy keldi. Olarǵa óz rızashylyǵymyzdy bildiremiz. Sosyn bizdiń chempıonymyz Gennadıı Golovkınge de alǵysymyz sheksiz. Úlken jekpe-jekke daıyndalyp jatqanyna qaramastan, sonaý AQSh-tan ushyp keldi", - dedi A.Muxamedıuly. Osydan keıin jıynǵa kelgenderdiń bári Denıs Tendi bir mınýt únsizdikpen eske aldy.
Saltanatty shara barysynda mınıstr birqatar azamattarǵa «Dene shynyqtyrý jáne sportty damytýǵa sińirgen eńbegi úshin» tósbelgisin tapsyrdy. Olar - Túrkistan oblysy Ulttyq sport túrlerinen balalar men jasóspirimderdiń mamandandyrylǵan sport mektebiniń dırektory Ǵanı Axmetbaev, Kárken Ahmetov atyndaǵy olımpıada rezerviniń respýblıkalyq mamandandyrylǵan mektep-ınternaty-kolledji» RMM dırektorynyń sport jónindegi orynbasary Danara Baıdosova, "Aqsý aýdanynyń balalar men jasóspirimder sport mektebi» KMM oqytýshy-jattyqtyrýshysy Altaı Ǵalymjanov pen sport rezervi jáne ádistemelik qamtamasyz etý basqarmasynyń bas sarapshysy Baqytjan Esjanov. Budan bólek, «Qurmetti sport qyzmetkeri» tósbelgisi tabystaldy. Atap aıtqanda, Mańǵystaý oblysynyń Ulttyq basketbol federatsııasy respýblıkalyq fılıalynyń dırektory Samson Arakelıanǵa, Túrkistan oblysynyń «Múgedekterge arnalǵan keshendi mamandandyrylǵan sport mektebi» KMM júzýden jattyqtyrýshysy Sánııa Asýlovaǵa, Dýlatı atyndaǵy Taraz memlekettik ýnıversıtetiniń kafedra meńgerýshisi Sultan Qasymovqa, Aqtóbe oblysynyń dene shynyqtyrý jáne sport basqarmasy» MM «Jastar» oblystyq balalar men jasóspirimder sport mektebi» KMM dzıýdo bóliminiń ádiskeri Gúlnár Kósherbaevaǵa, Mańǵystaý oblysynyń kıkboksıng federatsııasynyń prezıdenti Aıtqalı Tileýmaǵambetovke, "Bokstan olımpıadalyq daıarlaý ortalyǵy» RMQK jasóspirimder qurama komandasynyń jattyqtyrýshysy Arkadıı Topaevqa, Sport jáne dene shynyqtyrý isteri komıteti qysqy sport túrleri basqarmasynyń bas sarapshysy Manat Ysqaqova, "Qazaqstan" AQ tóraǵasy Erlan Karınge berildi.
"Negizi, Erlan Karın buqaralyq aqparat quraldaryn ǵana emes, sportty nasıxattaýǵa da úlken úles qosyp keledi. Búginde "Qazaqstan" da, "Qazsport" ta barlyq sporttyq sharalardy kórsetip otyrady. Bunyń barlyǵyn uıymdastyrý ońaı emes. Myqty menedjment kerek", - dep atap kórsetti A.Muxamedıuly.