Astanada Sport kúni atap ótildi - FOTO/VIDEO
"Barsha qazaqstandyqtardy «Sport kúni» kásibı merekesimen shyn júrekten quttyqtaımyn! Tuńǵysh Prezıdentimiz Nursultan Ábishuly Nazarbaevtyń salamatty ómir saltyn qalyptastyrýǵa úndegen sarabdal saıasatynyń arqasynda bizdiń elimizde sportqa aıryqsha kóńil bólinip, atalǵan sala jan-jaqty damyp keledi", - dep atap ótti saltanatty sharany ashqan QR Mádenıet jáne sport mınıstri Arystanbek Muhamedıuly.
Onyń aıtýynsha, Elbasy Joldaýyndaǵy 2020 jylǵa deıin buqaralyq sportpen aınalysatyn qazaqstandyqtardyń sanyn 30 paıyzǵa deıin jetkizý jónindegi tapsyrmany oryndaý mınıstrlik úshin strategııalyq mańyzy bar basym baǵyttaǵy sharýa. "Prezıdenttiń tapsyrmasy boıynsha Úkimet 2020 jylǵa deıin respýblıka eldi mekenderiniń 50 paıyzyn sport ǵımarattarymen qamtýdy josparlap otyr. Sondaı-aq, bıyl halqy 3000-nan asatyn eldi mekenderde 14 sport kesheni salynbaqshy", - dedi mınıstr.
A. Muhamedıulynyń aıtýynsha, taıaýda qabyldanǵan «Dene shynyqtyrý jáne sport týraly» jańa redaktsııadaǵy zań elimizdegi sporttyń kókeıkesti máselerin sheship, keleshegin kemeldendire túsýge, buqaralyq sporttyń damýyna ıgi yqpalyn tıgizedi.
"Yntymaǵy jarasyp, yrysy artqan Qazaqstanda sońǵy jyldary halyqaralyq deńgeıdegi iri sporttyq keshendi sharalar jıi uıymdastyrylyp júr. 2017 jyly bizdiń elimizde 28-shi Búkilálemdik qysqy Ýnıversıada ótedi. Al, Almaty 2022 jylǵy 24-shi qysqy Olımpıada oıyndaryn ótkizýden úmitker qala. Mine, osynyń bári Qazaqstannyń álemdik sport qaýymdastyǵy aldyndaǵy abyroıynyń qanshalyqty bıik ekenin kórsetse kerek. Sporttyq jetistikter Qazaqstannyń álemniń básekege eń qabiletti 30 memleket qataryna iligý strategııalyq mańyzy bar maqsatyna qol jetkizýge múmkindik beredi dep senemin", - dep atap ótti Mádenıet jáne sport mınıstri.
Onyń aıtýynsha, búgingi zamanda tek deni saý ult qana myń qubylǵan álemde básekege qabiletti bola alady. "Endeshe búingi sport kúni sportshylar men jattyqtyrýshylar úshin ǵana emes, dene tárbıesi men sportty nasıhattaıtyn barsha qazaqstandyqtar úshin erekshe mereke", - dedi mınıstr.
A. Muhamedıulynyń pikirinshe, kúlli álemdegideı bizdiń elimizde de sport túrli ult pen ulystyń, dinı senimder men mádenıetterdiń, rýhanı muralar men múddelerdiń jáne de urpaqtardyń basyn qosyp, bereke-birliginiń nyǵaıýyna qyzmet etip keledi.
"Sport - memlekettiń mártebesin kóterip, rýhyn asqaqtatatyn qýatty kúsh. Bul salada Táýelsiz Qazaqstannyń qol jetkizgen tabystarynyń da tolaıym ekendigi barshaǵa aıan.
Elimizdiń namysyn qoldan bermeı, sporttyq dańqyn eselep júrgen ul-qyzdarymyzdy barynsha qoldap, laıyqty túrde baǵalaı bilý bizdiń udaıy nazarda ustaıtyn ıgi isimizdiń biri bolmaq", - dep atap ótti ol.
Aıta keteıik, "Dáýlet" ulttyq tennıs ortalyǵyna kelgen sportsúıer qaýym ataqty sportshy Jaqsylyq Úshkempirovpen, sondaı-aq «Qazaqstan barysy-2014» chempıonatynyń jeńimpazy Muhıt Tursynovpen júzbe-júz kezdesip, suhbattasýǵa múmkindik aldy. Ujymdyq jattyǵýlardan soń qazaqstandyq estrada juldyzdarynyń qatysýymen kontserttik baǵdarlama usynyldy.
Sonymen qatar, shara barysynda Astanadaǵy sport ujymdary kórermenderge óz ónerlerin kórsetti. Ásirese «Bar Bars» klýbynyń strıt-vorkaýt boıynsha kórsetken ónerleri kópshiliktiń kóńilinen shyqty.
Sondaı-aq, shara kezinde Pavlodar, Kókshetaý jáne Óskemen qalalarynan tikeleı efır arqyly qosylǵan sportsúıer qaýym barsha qazaqstandyqtardy sport merekesimen quttyqtady.