Astanada iske jaramdy qansha bombapana bar

<p>Depýtattar elordadaǵy bombapanalardyń ornalasqan jerin ashyq jarııalaýdy surady, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.&nbsp;</p>

«Qudaı saqtasyn, bomba tastalsa nemese lańkestik aktiler bolsa aldymen qarapaıym halyq zardap shegedi. Sizderdiń fýnktsııańyz – halyqty qorǵaý. Mysaly, men eń jaqyn bombapananyń qaıda ekenin bilmeımin. Múmkin, máseleni zańdastyrý kerek shyǵar? Qaýip-qaterdiń bary ras. Dabyl qaǵylsa, men qaıda baramyn? Álemde bar qaýip-qaterlerge qarasaq, bul ózekti másele», - dedi qalalyq máslıhat depýtaty Qanat Ibraev.

Halyq qalaýlysynyń saýalyna jaýap bergen qalalyq tótenshe jaǵdaılar departamenti basshysynyń orynbasary Damır Ermaǵambetov bombapanalarǵa qatysty aqparattyń ashyq jarııa etilmeıtinin aıtty.

«Bombapanalardyń ornalasqan jeri boıynsha málimetter bar, biraq olardy jarııa túrde aıta almaımyn, jazbasha túrde bere alamyn», – dedi ol.

Atalǵan máseleni Senat depýtaty Andreı Lýkın de kóterdi. Onyń aıtýynsha, ákimdiktiń kommýnaldyq múlik basqarmasy bombapanalardy satý boıynsha ashyq konkýrstar jarııalaǵan.

Depýtattyń málimdeýinshe, ákimdik 2019-2020 jyldary Dúkenuly kóshesindegi jáne basqa da bombapanalardy jeke menshikke satty. Senator elorda turǵyndary úshin bombapanalardyń ornalasqan jeri týraly aqparatty ashyq jarııalaýǵa shaqyrdy.

«Qaladaǵy bombapana boıynsha tolyq monıtorıng júrgizildi. Onyń ishinde 25 bompana iske jaramdy bolyp shyqty. Olardyń qujaty ázirlenip, Azamattarǵa arnalǵan úkimet portalynda tirkeldi. Sonymen qatar atalǵan bombapanalar azamattyq qorǵanysty qamtý ortalyǵyna berildi», - dedi Astana qalasy ákiminiń orynbasary Ersin Ótebaev.