Astanada Shyńǵys Aıtmatovty eske alý keshi ótti
Keshtiń qurmetti qonaqtary qatarynda Shyńǵys Aıtmatovtyń uly Asqar Aıtmatov, Qyrǵyzstan Respýblıkasynyń mádenıet, aqparat jáne týrızm mınıstri Azamat Qaparuly, Aıtmatovtyń jaqyn dosy, ataqty aqyn Muhtar Shahanov, KSRO halyq ártisi Álibek Dinishev, RSFSR eńbek sińirgen ártisi, KSRO Memlekettik syılyq laýreaty, Qazaqstannyń eńbek sińirgen ártisi Natalıa Orynbasarova, QR Memlekettik syılyq laýreaty Maıra Muhamedqyzy jáne basqa da kórnekti tulǵalar boldy.
«Shyńǵys Aıtmatovtyń Qazaqstanǵa degen qurmeti erekshe edi, óziniń «Borandy beket» shyǵarmasyndaǵy Edige - naǵyz qazaqtyń beınesi ekenin basa aıtatyn. Osydan on jyl buryn Shyńǵys Tórequluly Elbasymyzdyń shaqyrýymen Qazaqstanǵa kelip, resmı sharalardan keıin jeke subhattasý múmkindigi týyp edi. Ókinishke qaraı, sońǵy kezdesýimiz eken. Ol kisiniń bizdiń elge, halqymyzǵa degen ystyq yqylasy áli esimde», - deıdi kesh jaıly oıymen bólisken QR Mádenıet jáne sport mınıstri Arystanbek Muhamedıuly Feısbýk paraqshasynda.
Mınıstrdiń jazýynsha, tiri kezinde klassıkke aınalǵan Shyńǵys Aıtmatov shyǵarmalaryn qyrǵyz jáne orys tilinde jazǵan. Jazýshynyń týyndylary 150-den astam tilge aýdarylǵan.
«Qyrǵyzstan men Qazaqstannyń Halyq jazýshysy, saıası qaıratker, dıplomat edi. Uly tulǵaǵa bas ıip, máńgilik este saqtaımyz», - deıdi Arystanbek Muhamedıuly.