Astanada sholý dóńgeleginde kommýnaldyq qyzmetkerlerdiń sýretteri jarııalandy

<p>ASTANA. KAZINFORM — Astanada sholý dóńgeleginde «Eńbegińizge myń alǵys!» jazýymen kommýnaldyq qyzmet mamandarynyń fotosýretteri jarııalandy, dep habarlaıdy elorda ákimdiginiń resmı saıty.</p>

65 metrlik attraktsıonda jarııalanǵan sýretter qalanyń ártúrli tusynan kórinedi jáne astanalyqtar men týrısterdiń nazaryn eriksiz aýdarady. Bul bastama elordamyzdyń tazalyǵy men abattandyrylýy jolynda eńbek etetin mamandardyń mańyzdy rólin eske salady.

Foto: Astana ákimdigi

— Bizdiń jumysymyz kóbine baıqala bermeıdi, al mundaı jazý úlken motıvatsııa beredi, — deıdi kommýnaldyq qyzmet mamandarynyń biri.

Elordanyń basty týrıstik nysandarynyń birine alǵys sózder men fotosýretterdi ornalastyrý ekologııalyq aktsııanyń mańyzdylyǵynyń sımvolyna aınaldy. Bıyl bastaý alǵan «Taza Qazaqstan. Astana — tazalyq pen tártiptiń úlgisi» aktsııasy qalanyń tazalyǵyn saqtaý úshin eriktiler men belsendi azamattardyń basyn qosady.

Foto: Astana ákimdigi

Aıta keteıik, osyǵan deıin bul attraktsıonda «Taza Qazaqstan» tsıfrlyq jazýy da jarııalanǵan.

Bıiktigi 65 metrlik sholý dóńgelegi 53 myń pıkselmen jabdyqtalǵan. Bul oǵan ártúrli vızýaldy elementterdi jarııalaýǵa múmkindik beredi. Ol elordanyń Nura aýdanynda ornalasqan.

Buǵan deıin habarlaǵanymyzdaı, elordanyń kommýnaldyq qyzmetteri kúsheıtilgen rejımge kóshti.