Astanada shańǵy maýsymy resmı túrde ashyldy

<p>ASTANA. KAZINFORM &ndash; Astanadaǵy Ortalyq saıabaqta shańǵy tebý maýsymy resmı túrde ashyldy. Osyǵan oraı shańǵydan jarys ótti, dep habarlady elorda ákimdigi.</p>

Shańǵy jarysy birneshe jas ereksheligi boıynsha 500 metr jáne 2,5 km qashyqtyqta ótti.

– Bıylǵy qys shańǵy jarysyn ótkizýge óte yńǵaıly. Shańǵy maýsymynyń ashylýyn osy ýaqytqa josparlaǵan sebebimiz – aýa raıyna baılanysty. Taǵy da aıtarymyz, qardyń qalyńdyǵy shańǵy jolyn joǵary deńgeıde jasaýǵa múmkindik berip otyr. Shańǵy – qysqy sporttardyń arasynda eń tanymaldarynyń biri. Astanamyzda shańǵy sportymen aınalysatyn adamdardyń sany óte kóp. Búgin de shańǵy maýsymynyń ashylýyna eńbektegen baladan eńkeıgen qarııaǵa deıin qatysyp jatyr. Eń qart qatysýshymyz 83 jasta. Shańǵy jarysynan bólek, shańǵy maýsymynyń ashylýynda belbeý kúresi, qol kúresi, arqan tartys, gir tasyn kóterý básekesinen saıys uıymdastyryldy, - dedi Astana qalasy ákimdiginiń «Sporttyq-buqaralyq is-sharalardy ótkizý dırektsııasy» KMM sporttyq-buqaralyq is-sharalardy josparlaý bóliminiń basshysy Kólbaı Janbek.

Búgingi shańǵy maýsymynda qatysýshylar 7 jas sanaty boıynsha synǵa tústi.

– Shańǵy maýsymyndaǵy adamnyń kóptigi jaqsy áser syılaıdy. Ózim júzýmen aınalysamyn. Al qysqy mezgilde shańǵyǵa den qoıamyn. Bir jyldan beri shuǵyldanǵanymnyń arqasynda tózimdiligimdi arttyrdym. Sporttaǵy jetistigim ómirge de septigin tıgizetinine senimdimin, - dedi shańǵy maýsymynyń eń jas qatysýshylarynyń biri, 9 jastaǵy Keńshilik Ahmet.

Sporttyq is-sharanyń sońynda ár jas shamasyna qaraı júldegerler dıplomdarmen, medaldarmen jáne baǵaly syılyqtarmen marapattaldy.

Qandasymyz shańǵy jarysynan Qytaı chempıony atanǵanyn jazǵan bolatynbyz.