Astanada shahmattan álem chempıony ataǵyn ıAn Nepomnıaşıı men Dın Lıren sarapqa salady

ASTANA. QazAqparat - Astana úshin sáýir shahmat aıyna aınalady. Elimizdiń bas qalasynda 1 sáýir men 7 mamyr aralyǵynda FIDE-niń 2023 jylǵy álem chempıonaty ótip, álemniń úzdik shahmatshysy anyqtalmaq, dep habarlaıdy Sporttty damytý dırektsııasy RMQK saıty.

Eki alyptyń aıqasynda kim jeńedi?

Bıylǵy álem chempıony ataǵyn reseılik ıAn Nepomnıaşıı men qytaılyq Dın Lıren sarapqa salmaq. Bul fınaldyń júlde qory – 2 mıllıon eýro. Jeńgeni osy qarjynyń 60%-yn alsa, 2-oryn alǵan grossmeıster qalǵanyna ıe bolady.

Bunyń bári byltyr 31 aqpanda sol kezdegi álem chempıony Magnýs Karlsen álem reıtınginde 3-orynda turǵan ıAn Nepomnıaşıımen oınap, ataǵyn qorǵaýdan bas tartqan soń bastaldy. Osydan keıin norvegııalyq shahmatshynyń ornyn úmitkerler arasyndaǵy týrnırde 2-oryn alǵan Dın Lıren basty. Osylaısha, chempıonsyz ótetin týrnır bir-birimen deńgeıles oıynshylardyń aıqasymen kópshilikti qyzyqtyryp otyr.

Eki shahmatshy byltyr jazda Madrıd qalasyndaǵy bedeldi týrnırge qatysqan. Nepomnıaşıı 14 baldyń 9,5-in jınap, jaqsy nátıje kórsetse, Dıng 8 upaıǵa qol jetkizdi.

Kimder kommentator bolady?

Shahmat álemindegi aıtýly básekege FIDE «sen tur men ataıyn» deıtin kommentatorlar qosynyn aldyryp otyr. Bul qatarda áıelder arasynda AQSh-tyń 8 dúrkin chempıony Irına Krýshti aıtýǵa bolady. Oǵan alǵashqy 4 oıynda 5 dúrkin álem chempıony Vıshvanatan Anand qosylyp, jumys isteıdi. Al 5-kezdesýden bastap Irına belgili grossmeıster Danııl Dýbovpen birge jankúıerlerge eki úzdiktiń oıynyn tápsirlep beredi.

Aıta keteıik, ıAn Nepomnıaşıı men Dın Lıren arasyndaǵy barlyq 14 oıyn St. Regis Astana qonaq úıinde elorda ýaqytymen saǵat 15:00-de bastalady. Ár 2 týrdan keıin demalysqa bir kún beriledi.

Ereje boıynsha oıyn kezinde alǵashqy 40 júriske 120 mınýt bólinedi. Sosyn, qalǵan 40 júriske bir saǵat berilmek. Al 61-júristen bastap ár oıynshynyń enshisinde 30 mınýt qalady. Bul aralyqta olardyń tasyn qımyldatýǵa 30 sekýnd ýaqyty bolady. Teń túsken jaǵdaıda jeńimpaz jyldam shahmat arqyly anyqtalyp otyrady.