Astanada shahmat Olımpıadasynyń alaýy jaǵyldy
Qazaqstanǵa Olımpıada alaýy FIDE uıymynyń otany, qazir XXXIII Jazǵy Olımpıada oıyndary ótip jatqan Parıjden keldi. Saltanatty estafetany QR premer-mınıstri Oljas Bektenovke FIDE prezıdenti Arkadıı Dvorkovıch tabystady.
«Olımpıada alaýynyń Astana qalasynda jaǵylýy – qazaqstandyqtar úshin zor maqtanysh. Osyndaı joǵary deńgeıli is-shara ótkizý Qazaqstandaǵy shahmat sportynyń odan ári damýyna eleýli úles qosady dep senemin», — dedi Oljas Bektenov.
Estafetanyń qurmetti alaý ustaýshylary qatarynda KazChess prezıdenti Tımýr Týrlov, shahmattan álem chempıony (20 jasqa deıingiler arasynda) Qazybek Nógerbek, blıts boıynsha eki dúrkin álem chempıony Bıbisara Asaýbaeva, klassıkalyq shahmattan qazirgi álem chempıony Dın Lıjen, Azııa Shahmat federatsııasynyń vıtse-prezıdenti jáne KazChess birinshi vıtse-prezıdenti Dármen Sádýaqasov, QR Ǵylym jáne joǵary bilim mınıstri Saıasat Nurbek, QR-daǵy balalar quqyǵy jónindegi ýákil Dınara Zákıeva, ushqysh-ǵaryshker, «Halyq qaharmany» ataǵynyń ıegeri Talǵat Musabaev, basqa da ataqty qazaqstandyq jáne sheteldik shahmatshylar, mádenıet qaıratkerleri men bedeldi tulǵalar boldy.
Al shahmat olımpıadasynyń alaýyn jaǵý qurmeti kóp dúrkin álem chempıony qytaılyq shahmatshy Hoý Ifange tapsyryldy.