Astanada shabandoz qyzdar synǵa tústi
Elorda mańyndaǵy «Arǵymaq» at-saýyqtyrý sport kesheninde Astana, Qaraǵandy, Almaty qalarymen qatar Almaty oblysynan kelgen 70-ke jýyq shabandoz arý ózara saıysqa tústi.
Jarystyń ashylý saltanatynda sóz alǵan Astana qalasynyń Ulttyq jáne olımpıadalyq at sporty túrleri federatsııasynyń prezıdenti Erlan Kanalımov qalada bul sport túri qarqyndy damyp kele jatqanyn atap ótti.
«Sizderdi aldymen búgingi kelip jetken kóktemniń shýaqty merekesi — 8 naýryz halyqaralyq áıelder kúnimen quttyqtaýǵa ruqsat etińizder. Konkýr qazaqqa jat emes. Bul da — arǵymaqtardyń saıysy. Aıtýly sport túri elimizde, sonyń ishinde elordada qarqyndy qanat jaıyp kele jatyr. Óıtkeni bul doda Astanada osymen ekinshi márte uıymdastyrylyp otyr. Jalpy mereke saıyn jıi ótip turady. Búgingi saıysta tek eń júırigi, eń myqtysy, eń laıyqtysy jeńiske jetsin degim keledi. Barshańyzǵa myń raqmet. Kóktem mereksi qutty bolsyn!» — dedi ol.
Elimizdiń túkpir-túkpirinen kelgen burymdylar saıystyń 6 baǵdary boıynsha synǵa tústi.
«Men búgin qyzdar arasyndaǵy jarysta «Jastar sanaty» boıynsha kedergilerdiń bıiktigi 100 sm sekirip shyqtym. Aldyńǵy qatardan kórinip, birinshi oryn aldym. Óte qýanyshtymyn. Ózim Astana qalasynyń sportshysymyn», — dedi Jastar sanatynyń jeńimpazy Malıka Serik.
Aıta keteıik, Astana qalasy ákimdiginiń qoldaýymen jáne Astana qalasynyń Ulttyq jáne olımpıadalyq at sporty túrleri federatsııasynyń uıymdastyrýymen ótip jatqan ashyq birinshiliktiń jalpy júlde qory 6 mln teńgeni quraıdy.